कर्तव्य बजावत वर्दीतला माणूस वाढवतोय कोरोना रुग्णांचं मनोधैर्य!

गोखलेनगर (पुणे) : कर्तव्यावर असताना श्रीकांत वाघवले यांना कोरोनाची लागन झाली. कुटुंबातील सदस्य, वरिष्ठ अधिकारी, नातेवाईक, मित्र यांनी धीर दिला आणि आज वाघवले पूर्वीप्रमाणे आपले कर्तव्य बजावत आहेत, पण हे करत असताना सामाजिक दायित्व म्हणून दररोज पाच कोरोना रुग्णांना धीर देण्याचे कामही ते करत आहेत.

- खडकवासला धरण बुधवारी भरणार; मुठा नदीत पाणी सोडणार​

पुणे शहरात सोमवार पेठेतील गुन्हे शाखेत कार्यरत असलेले श्रीकांत वाघवले यांची कोरोना चाचणी पाॅझिटीव्ह आली. गुन्हे शाखेत काम करीत असताना युनिट-१ हद्दीतील बराचसा भाग प्रतिबंधित क्षेत्रात येत असल्याने त्यांना सतत बाहेर फिरावे लागत होते. अशातच चाचणी पॉझिटिव्ह आल्यामुळे वाघवले यांना टेन्शन आले होते; परंतु त्यांची पत्नी आणि मुलीची चाचणी निगेटिव्ह आल्यामुळे त्यांनी सुटकेचा श्वास सोडला. डाॅक्टर, वरिष्ठ अधिकारी यांनी नियमित विचारपूस केली, याचा सकारात्मक परिणाम झाला आणि कोरोनातून बरे होत ते पुन्हा कर्तव्यावर रुजू झाले. सहकाऱ्यांनी मनोधैर्य वाढवले ‌म्हणूनच आज वाघवले इतर कोरोना रुग्णांना मानसिक आधार देत आहेत.

- बाप रे! पुणे जिल्ह्यात ऑगस्टअखेर होणार कोरोना रुग्णांची 'एवढी' संख्या

पोलीस आयुक्त, सह आयुक्त, वरिष्ठ अधिकारी यांच्या मार्गदर्शनाखाली 'भरोसा सेल'च्या माध्यमातून पुणे पोलिस दलातील जे कोरोनामुक्त होऊन परत कर्तव्यावर हजर झाले आहेत. त्यांच्यामार्फत पुणे शहरातील कोरोना पेशंटशी संवाद साधत आहेत. दररोज ५ कोरोना रूग्णांना मानसिक आधार देण्याचं काम देखील ते करतात. नागरिकांनी कोरोना झाला तर काय काळजी घ्यायला हवी, घाबरून न जाता सकारात्मक विचारांनी कोरोनावर मात करू शकतो, यासह कोरोना रुग्णांची आर्थिक अडचण असेल, तर इतर पर्याय कोणते आहेत याची माहिती देऊन कोरोना रुग्णांचे मनोधैर्य वाढवण्याचे काम वाघवले करत आहेत.

- प्रशासक नियुक्तीवरून महाआघाडी सरकारला ३४ याचिकांचे आव्हान

"कोरोनात तुम्हाला औषधांबरोबर मानसिक आधाराची गरज असते. जेवढे तुम्ही सकारात्मक राहाल, तेवढे लवकर तुम्ही कोरोनावर मात करू शकता. कोरोनाला घाबरून न जाता डाॅक्टरांच्या सल्ल्याने स्वत:ची काळजी  घ्यायला हवी".
- श्रीकांत किसन वाघवले, पोलिस युनिट-१ गुन्हे शाखा, पुणे शहर.

- पुण्याच्या बातम्या वाचण्यासाठी येथे ► क्लिक करा

(Edited by : Ashish N. Kadam)