- प्रकाश शेलारखुटबाव - जीवघेण्या अपघातातून बचावलेल्या देलवडी (ता. दौंड) येथील सुभाष जाधव यांनी जिद्दीने अपंगत्वावर मात केली. आज रायगड येथे आदर्श नागरिक घडविण्याच्या भूमिकेतून माध्यमिक शिक्षक म्हणून त्यांचा ज्ञानदानाचा यज्ञ अखंडपणे सुरू आहे. .सुभाष जाधव यांना लहानपणापासूनच अभ्यासाची आवड होती. वडील जगन्नाथ जाधव मुळा-मुठा नदीच्या पात्रामध्ये मासेमारी करायला जायचे. आई हिराबाई कुटुंबाला हातभार म्हणून टोपल्या व दुरड्या विणण्याचे काम करायच्या. सुभाष लहानपणीच आई-वडिलांना त्यांच्या कामांमध्ये मदत करायचे..जिल्हा परिषद प्राथमिक शाळा, देलवडी, महात्मा गांधी विद्यालय उरुळी कांचन, भैरवनाथ ज्युनिअर कॉलेज, खुटबाव व एकनाथ सीताराम दिवेकर विद्यालय, वरवंड येथे त्यांनी पदवीचे शिक्षण पूर्ण केले. हे करत असताना शिक्षणाचा खर्च भागावा म्हणून त्यांनी मजुरीचे कामही केले..पदवीला चांगले गुण मिळाल्याने कोल्हापूर येथे एका महाविद्यालयात अध्यापन पदवी प्राप्त केली. विकास शेलार यांच्या ओळखीतून देलवडीपासून २५० किलोमीटर लांब असणाऱ्या न्यू इंग्लिश स्कूल, गांगवली (ता. माणगाव, जि. रायगड) येथे माध्यमिक शिक्षक म्हणून नोकरी सुरू केली..सर्वकाही आलबेल असताना १५ जून २०१० ला रायगडवरून पुण्याकडे एका लग्नासाठी येत असताना ताम्हिणी घाटामध्ये जाधव यांच्या दुचाकीचा अपघात झाला. यात जाधव हे दुचाकीसह १५ फूट दरीमध्ये कोसळले. यात जाधव यांच्या मणक्याला गंभीर दुखापत झाली. जाधव यांची अवस्था पाहून भविष्यात ते चालू शकतील यावर कुणाचाच विश्वास नव्हता. पुण्यातील नामांकित हॉस्पिटलमध्ये शस्त्रक्रिया झाली..त्यानंतर वर्षभर जाधव अंथरुणाला खिळून होते. इच्छाशक्तीच्या जोरावर, दररोज नियमितपणे डॉक्टरांनी सांगितलेला व्यायाम करून एका वर्षानंतर त्यांनी चालण्यास सुरुवात केली. आजारपणाच्या काळात पत्नी रेखा व आई हिराबाई यांनी जाधव यांचे मनोबल वाढवले..सुरुवातीला वॉकर, नंतर आहार व व्यायामाच्या मदतीने काठीच्या आधाराने सध्या ते चालत आहेत. रायगड येथे ज्ञानदान करताना अपंग असूनही जाधव हे विद्यार्थ्यांना खेळाचे धडे देत आहेत. शालेय शिस्त, शिष्यवृत्ती, दप्तर विरहित शाळा, अभ्यासिका आदी उपक्रम राबवत त्यांनी शाळेचा लौकिक वाढवला आहे..जाधव यांची मोठी मुलगी आदिती अभियंता आहे, तर मुलगा आर्यन बारावीला आहे. देलवडी गावातील जय मल्हार ग्रंथालय व वाचनालय हा उपक्रम जाधव यांच्या सूचनेवरून सुरू झाला आहे. गावात वृक्षारोपण, व्याख्यानमाला, मल्हार नगरीचे सुपुत्र पुस्तक निर्मिती आदी उपक्रमांमध्ये त्यांचा सक्रिय सहभाग आहे..आयुष्यात अनेक संकटे आली. परिस्थितीने संकटावर मात करायला शिकलो. आज ज्ञानदानाचे पवित्र काम करीत आहे. माझ्या गावात ४० शिक्षक व १८९ अभियंते आहेत. या गावचा मी नागरिक असल्याचा मला सार्थ अभिमान वाटतो. भविष्यात शिक्षण क्षेत्रामध्ये नवनवीन प्रयोग करून आदर्श विद्यार्थी घडवायचे आहेत.- सुभाष जाधव, माध्यमिक शिक्षक.सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.
