तळेगाव ढमढेरे : तळेगाव ढमढेरे (ता. शिरूर) प्राथमिक आरोग्य केंद्राच्या अंतर्गत १६ गावात कोरोनाचा प्रादुर्भाव वेगाने वाढत असून, पाच दिवसांत ५३३ रुग्णांची वाढ झाली असल्याची माहिती वैद्यकीय अधिकारी डॉ. प्रज्ञा घोरपडे यांनी दिली. १२ ते १६ एप्रिल दरम्यान अवघ्या पाच दिवसांत सोळा गावांमध्ये ५३३ कोरोना बाधित रुग्ण असून, त्यापैकी शिक्रापूर १६०, बुरुंजवाडी १०१ आणि तळेगाव ढमढेरे ८६ या तीन गावांत पाच दिवसांमध्ये एकूण ३४७ कोरोना बाधित रुग्ण झाले असल्याने आरोग्य विभाग व स्थानिक प्रशासन चिंताग्रस्त झाले आहे.
तळेगाव ढमढेरे प्राथमिक आरोग्य केंद्रातर्गत औद्योगिक कामगार व मजुरांची संख्या जास्त असून, गावाबाहेर ये-जा करणाऱ्या नागरिकांची संख्याही जास्त आहे. संसर्गातून कोरणाची बाधा नागरिकांना होत असून कोरोनाची साखळी तोडण्यासाठी सर्वांनी खबरदारी घ्यावी, तोंडाला मास्क लावावे, गर्दीत जाणे टाळावे, सामाजिक अंतर ठेवावे व शासनाच्या नियमांचे पालन करावे असे आवाहन प्रशासनाने नागरिकांना केले आहे.
दरम्यान, तळेगाव ढमढेरे हे संपूर्ण गाव प्रशासनाने प्रतिबंधित क्षेत्र म्हणून घोषित केले असून येथील ग्रामपंचायतीने कोरोनाची साखळी रोखण्यासाठी खबरदारीचा उपाय म्हणून संपूर्ण गावात जंतूनाशक फवारणी केली. विविध ठिकाणी सूचना फलक लावले असल्याची माहिती सरपंच अंकिता भुजबळ, उपसरपंच नवनाथ ढमढेरे व ग्रामविकास अधिकारी संजय खेडकर यांनी सांगितली.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.