कात्रजकरांनो, निश्चिंत व्हा ! आता होणार पुरेसा पाणीपुरवठा कारण...

गोकुळनगर (पुणे) : कात्रज, सुखसागरनगर, कोंढवा रस्ता, येवलेवाडी या भागाला महिनाभरानंतर पुरेसा पाणीपुरवठा होऊ शकेल. केदारेश्‍वर आणि महादेवनगर येथील साठवण टाक्‍यांचे काम अंतिम टप्प्यात आले आहे. त्यामुळे या भागातील पाण्याची समस्या सुटेल, अशी माहिती कोंढवा, येवलेवाडी क्षेत्रीय कार्यालयाच्या अध्यक्षा मनीषा कदम यांनी दिली. 

मोटार विहिरीत कोसळून महिलेसह दोन बालकांचा मृत्यू

महापालिकेच्या वतीने सध्या इस्कॉन मंदिराजवळ केदारेश्‍वर येथे 60 लाख लिटर; तर महादेवनगर येथे 70 लाख लिटर क्षमतेच्या टाक्‍या बांधण्यात येत आहेत. या कामाची पाहणी बुधवारी लोकप्रतिनिधी आणि अधिकाऱ्यांनी केली. त्यानंतर कदम यांनी ही माहिती दिली. या वेळी मनीषा कदम, रंजना टिळेकर, वृषाली कामठे, वीरसेन जगताप, रायबा भोसले, चेतन टिळेकर, सुनील कामठे, राजाभाऊ कदम; तसेच आशिष जाधव, राहुल समोरचे, शांतीलाल कोळेकर, अमोल पुंडे, नितीन खुडे, हर्षल जगदाळे, संजय देशमुख आदी अधिकारी उपस्थित होते. 

पुणे- मुळशी प्रवास करताय? सावधान..

या वेळी जाधव म्हणाले, की संपूर्ण कात्रज, सुखसागरनगर, कोंढवा व परिसरातील उपनगरीय भागातील सहकारी गृहरचना संस्था व स्वतंत्र घरांसाठी ही उपाययोजना आहे. केदारेश्वर टाकीतून येवलेवाडी, टिळेकरनगर, कोंढवा गाव, राजीव गांधी नगर वसाहत या भागांना पाणीपुरवठा होईल. या टाकीचे काम 10 जुलैपर्यंत पूर्ण होईल; तर महादेवनगर टाकीतून उत्कर्ष सोसायटी, भारतनगर, राजस सोसायटी, सुखसागरनगर या भागांसाठी पाणीपुरवठा होईल. हे काम 31 जुलैपर्यंत पूर्ण होईल. त्यामुळे सध्या अवेळी व कमी दाबाने पाणी मिळणाऱ्या भागांना महिनाभरानंतर पुरेसा पाणीपुरवठा होईल.