औषधी गुणधर्माच्या काळ्या भाताचा प्रयोग यशस्वी | Sakal
sakal

बोलून बातमी शोधा

औषधी गुणधर्माच्या काळ्या भाताचा प्रयोग यशस्वी
औषधी गुणधर्माच्या काळ्या भाताचा प्रयोग यशस्वी

औषधी गुणधर्माच्या काळ्या भाताचा प्रयोग यशस्वी

sakal_logo
By

वेल्हा, ता.८ : पारंपरिक भात शेतीपेक्षा अधिक उत्पन्न देणाऱ्या पिकाच्या लागवडीला जोड देण्याच्या उद्देशाने वेल्हा तालुक्यात प्रथमच औषधी गुणधर्म असलेल्या काळ्या भाताच्या लागवडीचा प्रयोग यशस्वी झाला आहे. आरोग्यदायी या तांदळास देशांतर्गत तसेच विदेशीत मागणी आहे. त्यामुळे तालुक्यातील चिरमोडी, मार्गासनी, वांगणी, वांगणीवाडी, अडवली, अस्कवडी, वाजेघर इ. गावांमध्ये ''आत्मा''च्या सहकार्याने प्रात्यक्षिके घेण्यात आली.

महाराष्ट्र शासन कृषी विभाग, कृषी तंत्रज्ञान व्यवस्थापन यंत्रणा (आत्मा) व तोरणा शेतकरी उत्पादक कंपनीच्या माध्यमातून तब्बल २० एकर क्षेत्रावर काळा भात लागवडीची प्रात्यक्षिके घेण्यात आली आहेत, अशी माहिती आल्याचे तालुका कृषी अधिकारी धनंजय कोंढाळकर यांनी दिली आहे.
साधारण २०० ते २५० रुपये प्रति किलो दराने याची विक्री होते. या भाताच्या बियाण्याची किमत देखील अधिक असून, प्रति किलो बियाणे ३०० ते ४०० रुपये (वाणानुसार) एवढा दर आहे.

अल्प जागेमध्ये तेवढ्याच श्रमामध्ये काळा भात शेतीतून शेतकऱ्यांना चार ते पाच पट अधिक उत्पन्न मिळत असल्याने शेतकऱ्यांनी जास्तीत जास्त क्षेत्रावर काळ्या भाताची लागवड करून उत्पन्न मिळवावे, असे मत ''आत्मा''चे तालुका तंत्रज्ञान व्यवस्थापक नीलेश अबदागिरे यांनी व्यक्त केले.

दरम्यान, कृषी विभागाच्या कृषी संजीवनी मोहिमेच्या माध्यमातून व तोरणा ॲग्रो फार्मर्स प्रोड्युसर कंपनीच्या सहकार्याने शेतकऱ्यांना काळा भाताच्या औषधी गुणधर्माविषयी माहिती दिली व काळा भात लागवडीसाठी प्रेरित केले.

भाताचे वाण
१. कालीपत्ती २. चाको

नियमित भाताच्या दरापेक्षा मिळतो पाच पट दर
काळ्या भाताच्या नियमित सेवनाने कर्करोग व हृदयरोग देखील टाळता येतो. शरीरातील चरबीचे प्रमाण देखील कमी करता येते. असा हा बहुपयोगी औषधी काळा भात पिकवण्याचे प्रमाण मात्र कमी आहे. साधारणपणे ११० ते १५० दिवसांत (वाणानुसार) या पिकाचे एकरी १३ ते १५ क्विंटल एवढे उत्पादन येते जे नियमित भातापेक्षा कमी आहे. मात्र या भाताला भाव नियमित भाताच्या दरापेक्षा चार ते पाच पट अधिक मिळतो.

काळ्या भाताचे गुणधर्म -
* जीवनसत्त्व बी व ईचे उत्तम स्रोत.
* हृदयरोगाचा धोका कमी होतो.
* रक्तदाब व मधुमेह नियंत्रणात राहतो
* अँटीऑक्सीडेंटचा समावेश
* रोगप्रतिकारक शक्ती वाढते.
* पचनशक्ती सुधारणे.

कोट...
शेतकरी बचत गट व शेतकरी उत्पादक कंपन्यांच्या माध्यमातून कृषी उत्पादन वाढीसाठी कृषी विभाग व आत्माअंतर्गत विविध उपक्रम राबवण्यात येतात. शेतकऱ्यांना उत्पादनानंतर चांगला भाव मिळावा यासाठी विकेल ते पिकेल अभियानाच्या माध्यमातून विक्री व्यवस्था निर्माण करण्यात येत आहे.
- धनंजय कोंढाळकर, तालुका कृषी अधिकारी वेल्हा.

काळा भाताच्या पिकासाठी पाण्याचे प्रमाण कमी लागत असून, ज्या ठिकाणी हळव्याभाताची शेती केली जाते. अशा ठिकाणी हे पीक अत्यंत चांगल्या पद्धतीने येते. शहरातील मॉलमध्ये याच तांदळास दोनशे ते अडीचशे रुपये प्रति किलो भाव मिळतो. परंतु ग्रामीण भागातील शेतकऱ्यांसाठी या तांदळास बाजार पेठ उपलब्ध होणे गरजेचे आहे.
- नथू वालगुडे, प्रगतशील शेतकरी, मार्गासनी (ता. वेल्हा)

00972

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
loading image
go to top