जगदंबा मित्र मंडळ प्रथम

जुन्नर, ता. २७ : जुन्नर येथील शिवनेरी स्मारक मंडळाच्या वतीने आयोजित ‘किल्ले बनवा स्पर्धा २०२५’ मध्ये १७० स्पर्धकांनी मिळून विविध २७ किल्ले साकारले. या स्पर्धेत भोई आळीच्या जगदंबा मित्र मंडळाने प्रथम क्रमांक पटकावला. तर, राष्ट्रीय तेली बुधवार पेठ, पंचलिंग मित्र मंडळ, सागर गिरणा सोसायटी व परदेशपुरा गोसेवा संघ यांनीही अनुक्रमे बक्षिसे मिळवली.
स्पर्धेचा बक्षीस वितरण सोहळा रविवारी (ता. २६) पार पडला. छत्रपती शिवाजी महाराजांवरील गीतांनी कार्यक्रमाची सुरवात झाली. दुर्ग अभ्यासक विनायक खोत हे प्रमुख पाहुणे म्हणून उपस्थित होते. मयूर महाबरे, विक्रम परदेशी, अनिल रोकडे, रोहित परदेशी, अॅड. वैभव परदेशी, मधुकर काजळे, संदीप ताजणे, गणेश चव्हाण, सुरेश गवळी आदी उपस्थित होते.
संदीप धानापुणे यांनी प्रास्ताविक केले. किल्ल्यांचे परीक्षण अभिजीत शेटे, कृष्णा हरिश्चंद्रे, स्वानंद जठार व आकाश कुटे यांनी केले.
विद्यार्थी व युवकांत दुर्गसंवर्धनाची प्रेरणा, छत्रपती शिवाजी महाराजांच्या इतिहासाबद्दल जागृती तसेच पारंपरिक कलात्मकता जपणे या उद्देशाने दरवर्षी स्पर्धेचे आयोजन करण्यात येते. विजयी स्पर्धकांना छत्रपती शिवाजी महाराजांवरील पुस्तके व अन्य भेटवस्तू देण्यात आल्या. शिववंदनेने कार्यक्रमाचा समारोप झाला.