Market Committee Election : मंचर बाजार समितीसाठी चार ठिकाणी मतदान केंद्र

मंचर : मंचर कृषी उत्पन्न बाजार समिती पंचवार्षिक संचालक मंडळ निवडणुकीसाठी शुक्रवारी (ता. २८) मतदान होणार आहे. त्यासाठी जय्यत तयारी झाली असून, आंबेगाव तालुक्यात डिंभे, घोडेगाव, मंचर व निरगुडसर या चार मतदान केंद्रामध्ये मतदान होणार आहे. मतदारांनी मतदानाचा हक्क बजवावा, असे आवाहन निवडणूक निर्णय अधिकारी तथा सहायक निबंधक (सहकार) पी. एस. रोकडे यांनी केले.

एकूण १५ संचालक पद जागांसाठी निवडणूक होत आहे. ग्रामपंचायत व सोसायटी मतदारांसाठी स्वतंत्र मतदान केंद्र आहेत. शुक्रवारी सकाळी आठ ते संध्याकाळी चार वाजेपर्यंत मतदानाची वेळ आहे. सोसायटी कृषी पतसंस्था गट- सर्वसाधारण दोन जागा, महिला एक जागा, इतर मागास प्रवर्ग जागा, अनुसूचित जमाती एक जागा असून, सोसायटीची मतदार संख्या ७२० आहे.

ग्रामपंचायत मतदार संघ- सर्वसाधारण दोन जागा, आर्थिकदृष्ट्या दुर्बल,अनुसूचित जातीसाठी प्रत्येकी एक जागा असून, मतदार संख्या ८३८ आहेत. मंचर कृषी उत्पन्न बाजार समितीच्या मुख्य कार्यालयात शनिवारी (ता. २९) सकाळी दहा वाजता मतमोजणी सुरु होणार आहे. मतदान व मतमोजणीसाठी सर्वांनी सहकार्य करावे, असे निवडणूक निर्णय अधिकारी रोकडे यांनी सांगितले.