तिरुपती गवळी पतसंस्थेच्या अध्यक्षपदी हिरामण रौधळ

पाईट, ता. १५ ः येथील तिरुपती गवळी ग्रामीण बिगरशेती सहकारी पतसंस्थेच्या अध्यक्षपदी उद्योजक हिरामण राघू रौधळ, उपाध्यक्षपदी धोंडिबा श्रीपती शेलार यांची बिनविरोध निवड करण्यात आली. या पतसंस्थेवर आमदार दिलीप मोहिते यांचे गेली वीस वर्षे वर्चस्व आहे.

राजगुरुनगर येथील कृषी उत्पन्न बाजार समितीच्या सभागृहात ही निवडणूक पार पडली. यावेळी संस्थेचे सर्व ११ संचालक उपस्थित होते.

रौधळ हे गेली १३ वर्षे सलग अध्यक्षपद भूषवीत आहेत. निवड बिनविरोध होण्यासाठी सर्वच संचालकांनी विशेष सहकार्य केल्याचे रौधळ यांनी सांगितले.
निवडणूक निर्णय अधिकारी म्हणून सहायक निबंधक हरिश्चंद्र कांबळे यांनी, तर सहायक म्हणून सचिव प्रा. गोपीचंद गायकवाड यांनी काम पाहिले.