मुदतीत अर्ज न भरल्यास विद्यार्थ्यांना शिष्यवृत्तीला मुकावे लागणार

पुणे - कोरोनाच्या संसर्गामुळे (Corona Infection) सध्या काही महाविद्यालये बंद (College Close) असून, ऑनलाइन अभ्यासक्रम (Online Study) सुरू आहे. त्यामुळे विद्यार्थी (Student) महाविद्यालयात उपस्थित राहत नाही. त्यामुळे बहुतांश विद्यार्थ्यांनी शिष्यवृत्तीचे (Scholarship) ऑनलाइन अर्ज सादर केलेले नाहीत. विद्यार्थी शिष्यवृत्तीपासून वंचित राहू नये, यासाठी विद्यार्थ्यांसाठी सरकारने मुदतवाढ दिली आहे.

केंद्र सरकार मॅट्रिकोत्तर शिष्यवृत्ती योजनेअंतर्गत अनुसूचित जाती, विमुक्त जाती, भटक्या जमाती, इतर मागासवर्ग व विशेष मागास प्रवर्गातील विद्यार्थ्यांसाठी महाडीबीटी संकेतस्थळावर शिष्यवृत्तीचे ऑनलाइन अर्ज भरण्याची प्रक्रिया सुरू आहे. या संकेतस्थळावर नवीन अर्ज भरण्यासाठी अनुसूचित जाती प्रवर्गासाठी २२ जानेवारीपर्यंत तर विजाभज, इमाव आणि विमाप्र प्रवर्गासाठी ३१ जानेवारीपर्यंत मुदतवाढ दिली आहे.

पुणे विभागातील महाविद्यालयांमध्ये २०२१-२२ मध्ये प्रवेश घेतलेल्या विद्यार्थ्यांनी त्यांचे अर्ज तत्काळ https://mahadbtmahait.gov.in या संकेतस्थळावर ऑनलाइन सादर करावेत. तसेच, महाविद्यालयांनी महाविद्यालय स्तरावर प्रलंबित नूतनीकरणाचे सर्व अर्ज ऑनलाइन प्रणालीतून अनुसूचित जाती प्रवर्गासाठी १७ जानेवारीपर्यंत तसेच विजाभज, इमाव व विमाप्र प्रवर्गासाठी ३१ जानेवारीपर्यंत संबंधित जिल्ह्यातील सहायक आयुक्त कार्यालयाकडे सादर करावेत, असे आवाहन समाज कल्याणच्या पुणे विभागाच्या वतीने करण्यात आले आहे.

कोरोनाच्या पार्श्वभूमीवर शिष्यवृत्तीपासून कोणी वंचित राहू नये, यासाठी सरकारने मुदतवाढ दिली आहे. त्यामुळे विद्यार्थ्यांनी मुदतीत ऑनलाइन अर्ज सादर करावेत. तसेच, सर्व महाविद्यालयांनी महाविद्यालय स्तरावर शिष्यवृत्तीचे अर्ज भरण्याबाबत विद्यार्थ्यांमध्ये जनजागृती करावी.

- बाळासाहेब सोळंकी, प्रादेशिक उपायुक्त, समाज कल्याण