ज्येष्ठांना घरातूनच करता येणार मतदान

पुणे, ता. ५ : कसबा पेठ व चिंचवड विधानसभा मतदारसंघांतील पोटनिवडणुकीमध्ये ८० वर्षांवरील ज्येष्ठ नागरिक व दिव्यांग मतदार यांना मतदान करणे सोपे होणार आहे. मतदानाचा टक्का वाढावा, म्हणून यंदा प्रथमच या ज्येष्ठ नागरिक व दिव्यांग मतदारांना घरामधून टपाली मतपत्रिकेद्वारे मतदान करता येणार आहे, अशी माहिती जिल्हाधिकारी डॉ. राजेश देशमुख यांनी दिली.

पोटनिवडणुकीच्या पार्श्वभूमीवर जिल्हाधिकारी डॉ. देशमुख यांनी सर्व संबंधित समन्वयक अधिकाऱ्यांच्या बैठक घेतली. त्यावेळी त्यांनी ही माहिती दिली. या वेळी पोलिस उपायुक्त आर. राजा, संदीपसिंग गिल, उपजिल्हा निवडणूक अधिकारी आरती भोसले आदी उपस्थित होते.

डॉ. देशमुख यांनी सांगितले, की ८० वर्षांवरील ज्येष्ठ नागरिक व दिव्यांग मतदार यांना मतदान करणे सुलभ व्हावे, यासाठी अशा पात्र मतदारांकडून नमुना १२ डी हा अर्ज मतदारांकडून वेळेत भरून घ्यावा. त्यादृष्टीने आवश्‍यक नियोजन करण्यात यावे.

मतदारांना सुलभ मतदान करता यावे यासाठीच्या सुविधांची माहिती द्यावी. मतदानाची टक्केवारी वाढविण्यासाठी मतदार जागृतीचे कार्य करावे. सी-व्हीजिल ॲपवरील तक्रारींचे कालमर्यादेत निवारण होईल, याकडे विशेष लक्ष द्यावे. निवडणूक आयोगाच्या सर्व सूचनांचे पालन करावे. निवडणुकीशी संबंधित सर्व अहवाल वेळेवर द्यावेत आणि कालमर्यादेत कामे करावीत. नागरिकांचा मतदानातील सहभाग वाढविण्यासाठी प्रयत्न करावेत, अशा सूचनाही त्यांनी दिल्या.