दावे निकाली काढण्यात राज्यात पुणे प्रथम

पुणे, ता. १५ : राष्ट्रीय लोक अदालतमध्ये राज्यात सर्वाधिक प्रकरणे निकाली काढण्यात पुण्याने पहिला क्रमांक कायम ठेवला आहे. शनिवारी झालेल्या लोकअदालतीत ७८ हजार २०६ प्रलंबित दावे निकाली लागली. सलग नवव्यांदा पुणे जिल्ह्याने दावे निकाली काढण्यात प्रथम क्रमांक मिळवला.

प्रमुख जिल्हा न्यायाधीश श्याम चांडक यांच्या मार्गदर्शनाखाली येथील लोकअदालतीचे आयोजन करण्यात आले आहे. यात घटस्फोटासाठी अर्ज केलेल्या सहा जोडप्यांनी समुपदेशनानंतर परत एकदा एकत्र राहण्याचा निर्णय घेतला. सहदिवाणी न्यायाधीश जागृती भाटिया यांनी दोन प्रकरणात वयोवृद्ध व्यक्ती असल्याने व्हिडिओ कॉन्फरसद्वारे सुनावणी घेतली. जिल्हा न्यायाधीश भूषण क्षीरसागर यांच्या पॅनेलवर ११३ मोटार अपघात प्रकरणात विविध विमा कंपन्यांकडून गरजूंना नुकसान भरपाई मिळाली. दिवाणी न्यायाधीश वरिष्ठ स्तर राजेंद्र तांबे यांच्या पॅनेलवर घेण्यात आलेल्या १,८२५ प्रकरणांपैकी ११८ जमीन अधिग्रहण प्रकरणे निकाली काढण्यात येऊन ११ कोटी ९५ लाख ३९ हजार रुपये एवढी रक्कम वसूल करण्यात आली.

११७ कोटी ५६ लाख तडजोड शुल्क वसूल
- तडजोडीतील २,२४,५१६ दाव्यांपैकी १३,७९५ दावे निकाली
- त्यात ७० कोटी ७२ लाख ४४ हजार ४२६ रुपये तडजोड शुल्क वसूल
- वादपूर्व १,९६,००८ प्रलंबित प्रकरणे, ६४,४११ प्रकरणे निकाली
- त्यात ४६ कोटी ८३ लाख ७८ हजार ३८४ तडजोड शुल्क वसूल
- ७८,२०६ प्रलंबित दावे निकाली

दाव्याचा प्रकार - निकाली दाव्यांची संख्या
- बँकेची कर्जवसुली - १,२७७
- तडजोड पात्र फौजदारी गुन्हे - ७,८१९
- वीज देयक - २४७
- कामगार विवाद खटले - ७
- भूसंपादन - ११८
- मोटार अपघात दावे न्यायाधिकरण - १२५
- वैवाहिक विवाद - २१७
- निगोशिएबल इन्स्ट्रुमेंट ॲक्ट - १,५२५
- इतर दिवाणी - ६७४
- महसूल - २०३
- पाणी कर - ६१,९९०
- ग्राहक विवाद - ६
- इतर - ३,९९८
एकूण - ७८,२०६

पुणे जिल्हा विधी सेवा प्राधिकरणातर्फे घेण्यात आलेल्या आठ राष्ट्रीय लोकअदालतीमध्ये नऊ लाखांपेक्षा जास्त दाखल असलेली व दाखलपूर्व प्रकरणे निकाली काढण्यात आली. अशा प्रकारे पुणे जिल्ह्याने राष्ट्रीय लोक अदालतीच्या आयोजनादरम्यान दावे निकाली काढण्यात अग्रेसर राहण्याची परंपरा कायम राखली आहे. या यशस्वी आयोजनासाठी जिल्ह्याच्या सर्व न्यायालयातील अधिकारी-कर्मचारी, विविध विभागांचे अधिकारी आणि नागरिकांचे चांगले सहकार्य मिळाले आहे. तर प्रमुख जिल्हा न्यायाधीश श्याम चांडक यांचे मोलाचे मार्गदर्शन मिळाले.
- मंगल कश्यप, सचिव, पुणे जिल्हा विधी सेवा प्राधिकरण