पोलिसांनी जप्त केलेल्या कार, दुचाकींचे टायर चोरीला

पुणे, ता. १ : येरवड्यातील वाहतूक पोलिस विभागाच्या आवारात शिरलेल्या चोरट्यांनी कार तसेच दोन दुचाकींचे टायर चोरून नेल्याची घटना उघडकीस आली. या प्रकरणी पोलिस कर्मचारी सावता माळी यांनी येरवडा पोलिस ठाण्यात तक्रार दिली आहे. त्यानुसार, अज्ञात चोरट्यांविरोधात गुन्हा दाखल केला आहे. माळी येरवडा पोलिस ठाण्यात मुद्देमाल कक्षात कारकून आहेत. गोल्फ क्लब रस्त्यावर वाहतूक विभागाचे कार्यालय आहे. या कार्यालयाच्या आवारातील मोकळ्या जागेत येरवडा पोलिसांनी वेगवेगळ्या गुन्ह्यात ताब्यात घेतलेली वाहने लावली आहेत. चोरटे वाहतूक विभागाच्या कार्यालयाजवळ असलेल्या मोकळ्या जागेत घुसले व त्यांनी एक कार आणि दोन दुचाकीचे टायर चोरले. पोलिस अंकुश डोंबाळे या गुन्ह्याचा तपास करीत आहेत.