मॉडेलिंगच्या आमिषाने २३ युवक-युवतींची फसवणूक

पुणे, ता. १७ : मॉडेलिंग क्षेत्रात दररोज पाच ते सहा रुपये कमवा, अशी सोशल मीडियावर जाहिरात करून युवक-युवतींची फसवणूक केल्याची घटना कोथरूड परिसरात घडली. या प्रकरणी प्राथमिक चौकशीत आरोपींनी २३ युवक-युवतींची ४४ लाख रुपयांची फसवणूक केल्याचे समोर आले आहे.
या प्रकरणी एका महिलेने कोथरूड पोलिस ठाण्यात फिर्याद दिली. त्यावरून पोलिसांनी श्रद्धा चंद्रकांत अंदुरे, योगेश मदनलाल मुंदडा (दोघे रा. छत्रपती संभाजीनगर), जय पंकज चावजी, शुभम जयप्रकाश पगारे, अनिरुद्ध बिपिन रासने (रा. कोथरूड) या संशयितांविरुद्ध गुन्हा दाखल केला आहे.
आरोपींनी सोशल मीडियावर ‘मेकअप आर्टिस्ट, हेअर स्टायलिस्ट, फॅशन डिझायनर, छायाचित्रकारांना मॉडेलिंग क्षेत्रात कामाची संधी’ अशी जाहिरात केली होती. तसेच, दररोज पाच ते सहा हजार रुपये मिळतील, असे सांगितले. त्यानुसार काही युवक-युवती त्यांच्याकडे गेले. त्यावेळी कंपनीत तीन महिन्यांसाठी चार हजार ४२५ रुपये आणि दोन वर्षांसाठी १७ हजार रुपये भरावे लागतील, असे त्यांना सांगण्यात आले. त्यांना भुसारी कॉलनीत एका स्टुडिओत बोलाविण्यात आले. त्यांनी २१ मार्चपासून काम सुरू होणार असल्याची बतावणी केली. परंतु त्यानंतर कंपनी आर्थिक अडचणीत असून, कंपनीला काम मिळाले नसल्याचे सांगण्यात आले. फिर्यादी महिलेला फसवणूक झाल्याचे लक्षात आल्यानंतर त्यांनी कोथरूड ठाण्यात तक्रार दिली. आतापर्यंत २३ युवक-युवतींनी तक्रार अर्ज दिले असून, त्यांची ४४ लाख रुपयांची फसवणूक झाल्याचे समोर आले आहे.