उन्हाचा चटका कायम

पुणे, ता. १७ ः शहर व परिसरात आकाश दिवसभर निरभ्र राहणार असून, या काळात उन्हाचा चटका कायम राहील, असा अंदाज हवामान खात्याने वर्तवला आहे. दुपारनंतर आकाश अंशतः ढगाळ होण्याची शक्यताही वर्तविली आहे.
पुण्यासह राज्यात आठवड्यापासून उन्हाची तीव्रता वाढत असून, शहरातील कमाल तापमान जवळपास ४० अंश सेल्सिअसपर्यंत नोंदविले जात आहे. बुधवारी शहरातील कमाल तापमान ३८.५ अंश सेल्सिअस नोंदविले गेले. पुढील काही दिवस शहरातील कमाल तापमान याच दरम्यान राहील. त्यामुळे उन्हाच्या चटक्यापासून वाचण्यासाठी पुणेकरांनी दुपारी बाहेर पडताना विशेष काळजी घेणे गरजेचे आहे. राज्याच्या कमाल तापमानात चढ-उतार सुरू आहे. मात्र, पारा चाळिशी पार असल्याने उन्हाचा चटका तापदायक ठरत आहे.
कमाल तापमानात गुरुवारी (ता. १८) चढ-उतार कायम राहण्याची शक्यता आहे. दरम्यान, बंगालच्या उपसागरातील ‘मोचा’ चक्रीवादळ निवळल्यानंतर अंदमान, निकोबार बेट समूहावर नैॡत्य मोसमी वारे (मॉन्सून) दाखल होण्यास पोषक हवामान झाले आहे. शुक्रवारपर्यंत (ता. १९) मॉन्सून दक्षिण बंगालचा उपसागर, दक्षिण अंदमान समुद्र आणि निकोबार बेटांवर दखल होण्याची शक्यता हवामान विभागाने वर्तविली आहे.