SPPU Admission : विद्यापीठ प्रवेशासाठी १० मे अंतिम मुदत

पुणे सावित्रीबाई फुले पुणे विद्यापीठातील विविध विभागांमध्ये प्रवेशासाठी आवश्यक सामाईक पात्रता परीक्षेची घोषणा करण्यात आली आहे. प्रवेश परीक्षेसाठी ऑनलाइन अर्ज करण्यास सुरुवात झाली असून १० मेपर्यंत अर्ज करण्याची अंतिम मुदत आहे.

विद्यापीठाच्या विभागांमध्ये विविध पदवी व पदव्युत्तर अभ्यासक्रम राबविले जातात. यासाठी दरवर्षी १०० गुणांची ऑनलाइन प्रवेश परीक्षा घेतली जाते. पुण्यातील विद्यापीठाच्या मुख्य संकुलासह नाशिक येथील उपकेंद्रातील अभ्यासक्रमांचाही या प्रवेश परीक्षेत सहभाग आहे. पारंपरिक अभ्यासक्रमांसह व्होकेशनल, तांत्रिक, व्यवस्थापन, ललित कला, उपयोजित विज्ञानातील अनेक अभ्यासक्रमांचा यात समावेश आहे. पूर्वी पदव्युत्तर अभ्यासक्रमांसाठी ओळखले जाणारे विद्यापीठ आता पदवी अभ्यासक्रमांबरोबरच सर्वसमावेशक पदवीचे केंद्र बनत आहे. त्यामुळे इयत्ता बारावी उत्तीर्ण विद्यार्थ्यांनाही विद्यापीठातील काही अभ्यासक्रमांना प्रवेश मिळविता येणार आहे.

प्रवेश परीक्षेचे स्वरूप

• २० गुणांची सामान्य ज्ञान व अभियोग्यतेची प्रश्‍नपत्रिका, तर ८० गुणांची मुख्य विषयाची प्रश्‍नपत्रिका असेल

• चुकीच्या प्रश्नाला एकचतुर्थांश गुण वजा होणार

• दोन तासांची ऑनलाइन प्रवेश परीक्षा

महत्त्वाच्या तारखा

अर्ज करण्याची अंतिम मुदत : १० मे

पदवी अभ्यासक्रमाची प्रवेश परीक्षा : १३ जून

पदव्युत्तर पदवी अभ्यासक्रमांची प्रवेश परीक्षा : १४ ते १६ जून

अधिक माहितीसाठी : https://campus.unipune.ac.in/CCEP/Login.aspx