Pune Crime News : गाडीची लाईट का चमकावली म्हणून २० जणांच्या टोळक्याकडून दोघांना मारहाण

पुणेः गाडीची लाईट चमकावल्याच्या किरकोळ कारणाववरुन २० जणांनी मिळून दोघांना मारहाण केल्याची घटना पुण्यात घडली आहे. या प्रकरणी कोंढवा पोलिस ठाण्यामध्ये गुन्ह्याची नोंद करण्यात आलेली आहे.

पुण्यातील कोंढवा परिसरामध्ये मारहाणीची घटना घडली आहे. महमदवाडी येथे दोन तरुण कॉफी पिण्यासाठी आले होते. त्यावेळी त्यांनी त्यांच्या दुचाकीची लाईट समोर असलेल्या तरुणांच्या डोळ्यावर चमकावली. यातून दोन्ही गटात वादावादी सुरू झाली.

या वादाचे रूपांतर हाणामारीत झाले आणि त्याच ठिकाणी असलेल्या रस्त्यावर एका गटाने समोरच्या तरुणाला त्याचे कपडे फाटेपर्यंत त्याला मारहाण केली. या घटनेमुळे काही वेळासाठी या परिसरात भीतीचे वातावरण होते.

या घटनेचा व्हिडीओ समोर आला असून कोंढवा पोलिसांनी दोन्ही बाजूच्या 10 ते 11 जणांवर गुन्हा दाखल केला आहे. प्रकरणाचा पुढील तपास पोलिस करीत आहेत.

दरम्यान, मागच्या वर्षभरापासून पुण्यातील गुन्हेगारीच्या घटना थांबायचं नाव घेत नाहीयेत. कोयता गँगने अनेक दिवस दहशत माजवल्यानंतर अशा गुंडगिरीच्या घटना सातत्याने पुण्यात घडताना दिसून येत आहेत. त्यामुळे कायदा आणि सुव्यवस्थेचा प्रश्न निर्माण झाला आहे.