लॉकडाऊनमध्ये तंबाखू विकणाऱ्याकडनं पोलिसांनी घेतला 'हप्ता' अन् मग...
पुणे : तंबाखू विक्री करणाऱ्या दुकानदाराला कारवाईची भीती दाखवून त्याच्याकडून 2300 रुपये घेणाऱ्या दोन बीट मार्शल पोलिस कर्मचाऱ्यांचे निलंबन करण्यात आले आहे. कोंढवा पोलिस ठाण्याच्या हद्दीत हा धक्कादायक प्रकार समोर आला असून परिमंडळ पाचचे पोलिस उपायुक्त सुहास बावचे यांनी निलंबनाचे आदेश दिले.
पोलीस शिपाई हर्षल मांढरे व सागर सुर्यवंशी अशी निलंबित केलेल्या दोन पोलिसांची नावे आहेत. शहरात संचारबंदीमध्ये फक्त अत्यावश्यक वस्तूंची दुकानेच उघडी ठेवण्यास परवानगी देण्यात आली आहे. त्यामध्ये किराणा दुकान, भाजीपाला, मेडिकलचा समावेश आहे. मात्र, २५ एप्रिल रोजी मांढरे व सूर्यवंशी हे कोंढवा पोलिस ठाण्यात नेमणुकीस असताना रात्र गस्तीवर होते. त्यावेळी ते खडी मशीन चौकातील एका किराणा दुकानावर गेले.
त्यांनी दुकानाची झडती घेतली. तेव्हा त्यांना एका भरणीत तंबाखूच्या पुढ्या असल्याचे आढळून आले. त्यावेळी त्यांनी याबाबत तत्काळ वरिष्ठांना कळवून कायदेशीर कारवाई करणे अपेक्षित होते. परंतु दोघांनी हा प्रकार कोणालाही सांगितला नाही. तसेच, त्यांनी दुकानदाराकडे पाच हजार रुपयांची मागणी केली. त्यानंतर एका महिलेच्या माध्यमातून दुकानदारांकडून 2300 रुपये घेतले.
याविषयी संबंधीत दुकानदाराने कोंढवा पोलिस ठाण्याच्या वरिष्ठांना हा प्रकार सांगितला. वरिष्ठ पोलिस निरीक्षकानी चौकशी केल्यानंतर दोघांनी पैसे घेतल्याचे दिसून आले. त्यांनी चौकशी करून याबाबतचा अहवाल परिमंडळ पाचचे पोलिस उपायुक्त सुहास बावचे यांच्याकडे पाठविला. त्यांनी दोघांना खुलासा करण्यास सांगूनही त्यांनी खुलासा केला नाही. त्यानंतर बावचे यांनी दोघांचे पोलिस खात्यातून निलंबन केले.
- पुण्याच्या बातम्या वाचण्यासाठी येथे ► क्लिक करा
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.