उजनी धरण भरण्याच्या मार्गावर

भीमा नदीकाठच्या 45 गावांना सावधानतेचा इशारा 

इंदापूर : पुणे जिल्ह्यातील धरणांतून सोडण्यात आलेले पाणी "उजनी'त वेगाने येत असून त्यामुळे उद्या (ता. 7) धरण शंभर टक्के भरण्याची चिन्हे आहेत. धरणात मंगळवारी एकूण 114.76 टीएमसी (95. 39 टक्के) पाणीसाठा झाला होता. भीमा नदीकाठच्या गावांना सावधानतेचा इशारा देण्यात आला आहे. 

पुणे जिल्ह्यातील धरणांचे पाणी मंगळवारी (ता. 6) सायंकाळी भीमा नदीत 2 लाख 94 हजार 431 क्‍युसेक वेगाने येत होते. त्यामुळे उद्या (ता. 7) उजनी शंभर टक्के भरण्याची चिन्हे आहेत. उजनीतून सध्या नदीत 1 लाख 51 हजार क्‍युसेकने पाणी सोडण्यात येत आहे. वीजनिर्मितीसाठी 1600 क्‍युसेक, कालव्यातून 2500 क्‍युसेक; तर बोगद्यातून 1200 क्‍युसेक पाणी सोडण्यात येत आहे.

उजनी धरणाच्या यशवंत जलाशयाची पाणी साठवणक्षमता 123 टीएमसी असून, धरणातील पाणीपातळी 115 टीएमसीपर्यंत स्थिर ठेवण्याचा धरण व्यवस्थापनाचा प्रयत्न आहे. धरणातील वाढत्या विसर्गामुळे धरणाच्या पाणलोट क्षेत्रातील भिगवण ते हिंगणगाव, कांदलगाव टप्प्यातील नदीकाठचे वीजपंप सुरक्षितस्थळी नेण्यासाठी शेतकऱ्यांची कसरत सुरू आहे.