धक्कादायक! शौचास गेलेल्या महिलेची छेडछाड; आरोपीच्या हल्ल्यात गमावले डोळे

शिरूर : प्रात:विधीसाठी घराबाहेर गेलेल्या महिलेची झाडीत लपून बसलेल्या अज्ञाताने छेडछाड केली. परंतू महिलेने प्रतिकार केला असता त्या अज्ञाताने जीवघेणा हल्ला केला. त्याच्या हल्ल्यात महिलेचे दोन्ही डोळे निकामी झाले आहेत. न्हावरे (ता. शिरूर) येथे काल रात्री नऊच्या सुमारास ही घटना घडली.

गंभीर जखमी अवस्थेत संबंधित महिलेला उपचारार्थ ससून रूग्णालयात दाखल करण्यात आले आहे. अज्ञात हल्लेखोराविरूद्ध शिरूर पोलिसांनी आज जीवघेणा हल्ल्याबरोबरच विनयभंगाचा गुन्हा दाखल केला आहे.

हेही वाचा :  पुण्यात उद्योगचक्राला गती; उत्पादनक्षमता आता ७२ टक्के

पोलिसांनी दिलेल्या माहितीनुसार, न्हावरे गाव परिसरात संबंधित ३७ वर्षीय महिला पतीसह पत्र्याच्या खोलीत राहावयास होती. काल रात्री नऊच्या सुमारास शौचास म्हणून ती घराच्या मागील बाजूस काही अंतरावर गेली असता, तेथे झुडपात एक तिशीतील तरूण दबा धरून बसला होता. त्याला पाहून महिलेने तुला आई-बहिण नाही का, असे म्हणताच संतप्त तरूणाने त्यांची छेडछाड करण्याचा प्रयत्न केला.

दरम्यान, त्यांनी प्रतिकार केला असता त्याने त्यांच्यावर हल्ला केला. केसाला धरून त्यांना खाली पाडून हातातील कठिण शस्त्राने तोंडावर फटके मारले. त्यात संबंधित महिलेचा एक डोळा बाहेर पडला; तर दुसरा निकामी झाला. दरम्यान, त्यांच्या आरडाओरड्याने शेजारचे लोक व महिलेचा पती मदतीला धावले असता, हल्लेखोर अंधाराचा फायदा घेऊन झुडपातून पळून गेला. ग्रामस्थांनी रात्रभर त्याचा परिसरात शोध घेतला मात्र शोध लागू शकला नाही.

या गंभीर प्रकाराची दखल घेत जिल्हा पोलिस अधिक्षक डॉ. अभिनव देशमुख, अतिरिक्त जिल्हा पोलिस अधिक्षक मिलिंद मोहिते, उपविभागीय पोलिस अधिकारी राहुल धस यांनी शिरूरचे पोलिस निरीक्षक प्रवीण खानापुरे, पोलिस उपनिरीक्षक बी. जे. पालवे, एस. एन. मोटे यांच्यासह आज घटनास्थळाची पाहणी केली. हा जीवघेणा हल्ला होण्यामागील कारणे पोलिस पथकाकडून तपासली जात असून, नेमके कारण अद्याप स्पष्ट झाले नसल्याचे पोलिस निरीक्षक खानापुरे यांनी सांगितले. या गंभीर प्रकरणाबाबत न्हावरे परिसरात दबक्या आवाजात उलट-सुलट चर्चा चालू असून, परिसरात व विशेषतः महिला-मुलींमध्ये घबराटीचे वातावरण पसरले आहे.

हेही वाचा : पीएमपीच्या ६० टक्के बस मार्गांवर; रोजचे एवढे प्रवासी करतात प्रवास

साधारणतः तिशीतील हल्लेखोराने तोंडाला लाल कापड गुंडाळले होते. काटकुळ्या देहाचा हा हल्लेखोर होता अशी प्राथमिक माहिती मिळाली असून, त्या अनुषंगाने पोलिस तपास करीत आहेत, असे पोलिस उपनिरीक्षक मोटे यांनी सांगितले.