मोठी बातमी : पुणे महापालिका आयुक्तांची बदली; विक्रमकुमार नवे आयुक्त 

पुणे : पुणे महापालिकेचे आयुक्त शेखर गायकवाड यांची बदली झाली असून, त्यांच्याजागी आता "पीएमआरडीए'चे आयुक्त विक्रम कुमार यांची नेमणूक करण्यात आली आहे. नवे आयुक्त कुमार हे सोमवारी पदभार स्वीकारणार आहते. गायकवाड यांच्याकडे पुन्हा साखर आयुक्तपदाचीच सूत्रे देण्यात आली आहे. जेमतेम साडेपाच-सहा महिन्यांतच गायकवाड यांची बदली झाल्याने आश्‍चर्य व्यक्त होत आहे. लॉकडाऊन आणि त्यातून निर्बंध लादण्याला गायकवाडांचा विरोध असल्याने तडकाफडकी बदलले असल्याचे सांगण्यात येत आहे. दुसरीकडे गायकवाड यांच्यासह प्रमुख अधिकाऱ्यांच्या अचानक बदल्या झाल्याने संपूर्ण प्रशासन हवालदिल झाले आहे. 

पुण्याच्या बातम्यांसाठी येथे क्लिक करा

दरम्यान, सध्याचे साखर आयुक्त सौरभ राव यांची विभागीय आयुक्त आयुक्त कार्यालयात विशेष अधिकारी म्हणून नेमणूक केली आहे. दीपक म्हैसेकर यांच्या सेवानिवृत्तीनंतर विभागीय आयुक्तपदाचा कार्यभार राव यांच्याकडे येण्याची शक्‍यता वर्तविण्यात येत आहे. गायकवाड यांची जानेवारीत महापालिका आयुक्तपदावर बदली झाली होती. त्यानंतर मार्चपासून ते कोरोनाविरोधातील मोहिमेत उतरले होते. पुण्यात कोरोना पसरण्याच्या शक्‍यतेने गायकवाड यांच्यासह साऱ्या अधिकाऱ्यांनी उपाययोजना आखल्या. त्यानंतरच्या लॉकडाउनमध्ये मात्र लोकांसाठी कठोर निर्बंध न लादता काही सवलती देण्याबाबत गायकवाड हे सकारात्मक होते. त्याचवेळी राज्य सरकारमधील वरिष्ठ मंत्र्यांना मात्र गायकवाड यांची भूमिका पटत नव्हती; तरीही धाडसाने काही निर्णय घेत गायकवाड यांनी पुणेकरांना दिलासा आहे. लॉकडाउनच्या पाचव्या टप्प्यांत मोठ्या प्रमाणात व्यवहार सुरू करण्यासाठीही गायकवाडांचा पुढाकार होता. त्यानंतर मात्र, गायकवाड हे राजकीयदृष्ट्या चर्चेत आले. येत्या सोमवारपासून नव्याने लादण्यात येणाऱ्या लॉकडाउनलाही गायकवाडांचा विरोध होता. या भूमिकांमुळे गायकवाड यांच्या बदलीची चर्चा होती. या पार्श्‍वभूमीवर गायकवाड यांच्यासह काही अधिकाऱ्यांच्या बदल्यांचे आदेश शनिवारी काढण्यात आले आहेत. दरम्यान, कोरोनाची स्थिती हाताळण्यात काही अधिकारी कमी पडत असल्याने त्यांच्या बदलीची शिफारस करण्यात येत असल्याचे केंद्र सरकारमधील वरिष्ठ अधिकारी कुणाल कुमार यांनीही सांगितले होते. 

आणखी वाचा - लग्नाला गेलेल्या बहीण-भावाला कोरोनाचा आहेर

आणखी दोघांची बदली?
महापालिकेतील उपायुक्त राजेंद्र मुठे यांच्यासह अन्य दोन अधिकाऱ्यांच्या बदलीची शक्‍यता वर्तविण्यात येत आहे. त्यात मुठे यांना पदोन्नती मिळाल्याने ते आता अतिरिक्त जिल्हाधिकारी झाले आहेत. परंतु, कोरोनाच्या पार्श्‍वभूमीवर मुठे यांच्यासह इतर अधिकाऱ्यांची बदली होणार नसल्याचे सरकारमधील वरिष्ठ सूत्रांकडून सांगण्यात आले आहे.

विक्रमकुमार यांच्यासमोर आव्हान
कृषी आयुक्त सुहास दिवसे यांची पीएमआरडीए चे मुख्य कार्यकारी अधिकारी म्हणून नियुक्ती करण्यात आली आहे तर सौरभ राव यांची पुण्याच्या विभागीय आयुक्त कार्यालयात 
विशेष अधिकारी म्हणून नियुक्ती करण्यात आली आहे. सौरभ राव हे पुण्यात जिल्हाधिकारी होते तसेच महापालिकेच्या आयुक्त म्हणूनही त्यांनी काम केले होते. सध्या पुण्यातील कोरोनाचा उद्रेक शमविण्यासाठी राज्य सरकारने त्यांची पुण्यात विशेष नियुक्ती केलेली आहे. पुण्यामध्ये कोरोनाचा उद्रेक कमी करण्याचे आव्हान नवनियुक्त महापालिका आयुक्त विक्रमकुमार यांच्यासमोर असेल. महापालिका आयुक्त  पदाचा कार्यभार लगेचच ते स्वीकारणार असल्याचे त्यांच्या कार्यालयातून सांगण्यात आले.

Edited by Raviraj Gaikwad