विमानतळ रस्त्यावर पाणीगळती

पुणे - जुना विमानतळ रस्त्यावर फाइव्ह नाइन चौकाच्या अलीकडे मोठ्या प्रमाणात पाणीगळती सुरू आहे. ही पाणीगळती गेल्या अनेक महिन्यांपासून सुरू असून, महापालिका पाणीपुरवठा विभागाने हवाई दल पाणीपुरवठा विभागाला याविषयी अनेकदा कळवूनही अद्याप दुरुस्ती झालेली नाही. त्यामुळे मोठ्या प्रमाणात पाणी वाया जात आहे.

फाइव्ह नाइन चौकातून नागपूर चाळीच्या दिशेने जाताना डाव्या हाताला असणाऱ्या बसथांब्याशेजारी ही पाणीगळती सुरू आहे. रस्त्यावरून वाहत पुढे ते १०० मीटर पर्यंत पसरते. त्यामुळे अनेकदा वाहन घसरून अपघातही होतात. या ठिकाणी वळण असल्यामुळे वाहनचालकांच्या जिवाला धोका उत्पन्न 
होत आहे. या जलवाहिनीतून हवाईदलाला पाणीपुरवठा होत असतो. त्यामुळे या पाणीपुरवठा वाहिनीची देखभाल दुरुस्तीची जबाबदारी हवाई दल पाणीपुरवठा विभागाची आहे. वाया जाणाऱ्या पाण्याचे महत्त्व लक्षात घेता महापालिकेच्या पाणीपुरवठा विभागाने पाणीगळती थांबविण्याबाबत हवाई दलाकडे पत्रव्यवहार केला आहे, परंतु त्या पत्रव्यवहाराला अध्याप प्रतिसाद मिळालेला नाही.

याविषयी हवाई दलाच्या पाणीपुरवठा अधिकाऱ्यांशी संपर्क होऊ शकला नाही.