भोर (पुणे) : भोर तालुक्याच्या अतिदुर्गम भागातील अभेपुरी गावच्या ग्रामस्थांनी उन्हाळ्यातील पाण्याचा प्रश्न सोडविण्यासाठी श्रमदानाने १५ हजार लिटर पाण्याची टाकी बांधली.
पुण्यातील ज्ञानप्रबोधिनी संस्थेने केलेल्या आर्थिक सहकार्यामुळे त्यांनी पाणीप्रश्न सोडवला. त्यामुळे आता ख-या अर्थाने आपण स्वातंत्र्यात असल्याची जाणीव आम्हाला होत असल्याची भावना ग्रामस्थांनी व्यक्त केली.
भोरपासून सुमारे ५५ किलोमीटर अंतरावरील अभेपुरी गावात ३० वर्षांपूर्वी सरकारने पाणी योजना पूर्ण केली. परंतु, योजनेची ५ हजार लिटर क्षमतेची टाकी जुनी झाली असून, त्यामधून मोठ्या प्रमाणात पाणी गळती सुरु होती. त्यामुळे ग्रामस्थांना दिवसभरात काही तासच पाणी मिळायचे. कित्येक दिवस दोन किलोमीटरवरून डोक्यावरून पाणी आणावे लागत होते. यासाठी नवीन जास्त क्षमतेची पाण्याची टाकी बांधण्याचा निर्णय ग्रामस्थांनी घेतला.
सरपंच लक्ष्मण हिरवे, पोलिस पाटील चंदर पोळ, कोंडिबा कोंढाळकर व विष्णू पोळ यांनी ज्ञानप्रबोधिनीचे अजित देशपांडे व अनिल पालकर यांच्याशी संपर्क करून टाकीसाठी आर्थिक मदत मागितली. त्यानुसार ज्ञानप्रबोधिनीने दीड लाख रुपयांची मदत केली.
ग्रामस्थांनी श्रमदान करून लोखंडी सळया वाकवून वेल्ड मेश व चिकन मेशच्या आधारे पाण्याच्या टाकीचे बांधकाम पूर्ण केले. लॉकडाउनमुळे कामाधंद्यासाठी बाहेरगावी असलेले नागरिक गावी आल्यामुळे त्यांनीही श्रमदानात मोलाचे सहकार्य केले.
अभेपुरीच्या ग्रामस्थांना सरकारकडून तीन वर्षांपूर्वी म्हणजे सन २०१७ मध्ये वीजजोड देण्यात आला. आता ज्ञानप्रबोधिनीमुळे त्यांच्या पाण्याचीसुध्दा सोय झाली आहे. त्यामुळे आम्हाला आता ख-या अर्थाने स्वातंत्र्यात असल्याची जाणीव होत असल्याची भावना ग्रामस्थांनी व्यक्त केली.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.