Kalmodi Dam : कळमोडी धरणातून आरळा नदिपात्रात सोडले पाणी; चास कमान धरणातील पाणीसाठा वाढणार

चास - खेड तालुक्याच्या पश्चिम पट्यातील नागरिकांच्या मागणीवरून पिण्यासाठी तसेच चास-कमान धरणाच्या पुनर्भरणासाठी कळमोडी (ता. खेड) धरणातून बुधवार ता. २ पासून आरळा नदिपात्रात पाणी सोडण्यास सुरूवात झाली.

या पाण्याचा फायदा आरळा नदितीरावर असलेल्या नागरिकांना पिण्यासाठी तसेच जनावरांसाठी होणार असल्याची माहिती जलसंपदा प्रशासन विभागाच्या वतीने देण्यात आली आहे. मात्र धरणातून सोडण्यात येणारे पाणी हे फवाऱ्यासारखे उडत असल्याने त्यातून उडणारे तुषार ऐन उन्हाळ्यात गारवा देणार असल्याने पर्यटकांची गर्दी होणार आहे.

खेड तालुक्याच्या पश्चिम पट्यातील आरळा नदिवर कळमोडी गावाजवळ १.५१ टीएमसी क्षमता असलेले हे कळमोडी धरण म्हणजे चास कमान धरणाच्या पाण्यापासून वंच्छित राहिलेल्या खेड तालुक्याच्या पश्चिम व पूर्व पट्यातील गावांसह आंबेगाव तालुक्यातील सातगांव पठार भागाचे नंदनवन वा वरदान ठरणारे हे धरण आहे.

सद्य स्थितीत या धरणात ९०.९२ टक्के (१.३७ टीएमसी) पाणीसाठा शिल्लक आहे. कळमोडी धरणाखालील असणाऱ्या कळमोडी, चिखलगांव, साकुर्डी, कहू, कोयाळी यांसह अन्य गावाजवळून वाहणाऱ्या आरळा नदिच्या पात्रात पाणी सोडल्याने शेतकऱ्यांना शेतीला पाण्याबरोबरच पिण्याच्या पाण्याचीही सोय होणार आहे.

या शिवाय नदिकिनारी असणाऱ्या पाणीयोजनाही ऐन उन्हाळ्यात सुरू राहणार आहेत. कळमोडी धरणातून आरळा नदिपात्रात पाणी सोडण्यास सुरूवात झाली असून २५० क्युसेक्स विसर्गाने हे पाणी वरील गावांमधून जाऊन चास कमान धरणाच्या जलाशयात समाविष्ट होणार असल्याने चास-कमान धरण्याच्या पाणीसाठ्यात वाढ होणार आहे.

धरणाच्या लाभक्षेत्रातील गावांचा पिण्याच्या पाण्याचा साठा शिल्लक ठेवून उर्वरीत सर्व पाणी चास-कमान धरणात सोडणार असल्याचेही प्रशासनाच्या वतीने सांगण्यात आले आहे.