पुणेकरांवर पाणीपट्टीचा बोजा

पुणे - महापालिकेच्या उत्पन्नाचा आकार वाढविण्यासाठी महापालिकेच्या प्रारूप अर्थसंकल्पात आयुक्तांनी प्रस्तावित केलेली मिळकतकरावरील १२ टक्के वाढ स्थायी समितीने फेटाळली. दुसरीकडे मात्र, समान पाणीपुरवठा योजनेच्या अंमलबजावणीसाठी सुचविलेली १५ टक्‍के पाणीपट्टी कायम राहणार आहे. 

महापालिकेच्या उत्पन्नात घट होत असल्याने विकासकामांवर परिणाम होत असल्याचे निदर्शनास आले आहे. तेव्हाच नवे आर्थिक स्रोत नसल्याने हमखास उत्पन्न वाढवून मिळणाऱ्या बाबींवर महापालिका आयुक्त सौरभ राव यांनी अर्थसंकल्पात भर दिला आहे. त्यानुसार राव यांनी २०१९-२० चा सुमारे सहा हजार ८५ कोटी रुपयांचा अर्थसंकल्प सादर केला. त्यात मिळकतकरात १२ आणि पाणीपट्टीत १५ टक्के वाढ सुचविली आहे. मिळकतकरातील वाढीमुळे नव्या आर्थिक वर्षात ११० कोटी रुपये मिळण्याचा प्रशासनाचा अंदाज आहे. महापालिका आयुक्तांच्या प्रारूप अर्थसंकल्पावर स्थायी समितीच्या बैठकांमध्ये चर्चा होत आहे. मिळकतकर आणि पाणीपट्टीबाबत विशेष सभेत चर्चा झाली. तेव्हा सदस्यांनी मिळकतकरवाढीला विरोध केला. त्यामुळे ही वाढ फेटाळल्याचे स्थायी समितीचे अध्यक्ष योगेश मुळीक यांनी सांगितले. मात्र, सुमारे २ हजार ३ कोटी रुपयांच्या समान पाणीपुरवठा योजनेसाठी पाणीपट्टीतील वाढ राहणार असल्याचे स्पष्ट झाले आहे. या योजनेच्या कामासाठी टप्प्या टप्प्याने वाढ करण्याचा निर्णय महापालिका प्रशासनाने यापूर्वी घेतला आहे. दरम्यान, आगामी लोकसभा आणि विधानसभा निवडणुकांच्या पार्श्‍वभूमीवर मिळकतकरात वाढ केल्यास पुणेकरांच्या रोषाला सामोरे जावे लागेल, या भीतीनेच ही वाढ फेटाळल्याची चर्चा आहे.