विहिरीचे पाणी न विचारता घेणे पडले महागात, चौघांवर पाणी चोरीचा गुन्हा

वडगाव निंबाळकर : शेजाऱ्याच्या शेतातील विहिरीचे पाणी न विचारता घेत असाल तर सावधान... कारण बारामती तालुक्यातील सुपे येथील चौघांवर पाणी चोरी केल्याचा गुन्हा नोंदवण्यात आला आहे. याबाबत सुधाकर तुकाराम रोकडे रा. बदलापूर पुर्व ता. अंबरनाथ जि. ठाणे यांनी दिलेल्या फिर्यादीवरून वडगाव निंबाळकर पोलीस ठाण्यामध्ये बारामती तालुक्यातील सुपे येथील प्रकाश मारुती जाधव, विकास प्रकाश जाधव, राहुल ज्ञानेश्वर जाधव, अतुल ज्ञानेश्वर जाधव यांच्यावर पाणी चोरी केल्याचा गुन्हा नोंदविण्यात आला आहे.

फिर्यादी रोकडे सेवानिवृत्त पोलीस अधिकारी आहेत त्यांची वडिलोपार्जित जमीन सुपे येथे आहे. कोरोना महामारीमुळे गावाकडे आले नव्हते. फिर्यादी परगावला असल्याचे पाहून आरोप ठेवण्यात आलेल्या वरील चौघांनी बांधालगत असलेल्या रोकडे यांच्या विहिरीवर त्यांच्या संमतीशिवाय वीज जोड घेऊन विद्युत पंप लावला. फिर्यादी गावचे यात्रेनिमित्त गावात आले यावेळी शेतावर गेले असता आपल्या शेतातून शेजाऱ्यांनी पाणी घेतल्याचे निदर्शनास आले. याबाबत विचारणा केली असता शिवीगाळ दमदाटी केली.

लॉकडाऊन मुळे रोकडे गावी येत नसल्याचा फायदा घेतला. रोकडे कुंटुंबातील सदस्यांनाही कोरोनाचा संसर्ग झाला होता. गावातील जमिनीकडे झालेले दुर्लक्ष पाहून शेजारील बांधकऱ्यांनी बेकायदा संमतीशिवाय शेतातील पाणी चोरी केल्याचा गुन्हा नोंदवण्यात आला आहे.