पुणे - पुणे शहरात निर्माण होणाऱ्या सांडपाण्यावर प्रक्रिया करण्यासाठी केंद्र सरकार आणि जायकाच्या मदतीने हाती घेण्यात आलेला सांडपाणी प्रक्रिया प्रकल्प रखडण्यामागे महापालिका प्रशासनच कारणीभूत असल्याचे समोर आले आहे. या योजनेंतर्गत अकरा ठिकाणी उभारण्यात येणाऱ्या सांडपाणी प्रक्रिया प्रकल्पांपैकी सहा ठिकाणच्या जागाच अद्याप ताब्यात आलेल्या नाहीत. ही चूक झाकण्यासाठीच प्रकल्पाच्या निविदा चढ्या दराने आल्याचा कांगावा प्रशासनाकडून करण्यात येत आहे का, अशा संशय व्यक्त होत आहे.
पुणे शहरात निर्माण होणाऱ्या सांडपाण्यावर प्रक्रिया प्रकल्प उभारण्यासाठी पुणे महापालिकेने केंद्र सरकारच्या राष्ट्रीय नदी संवर्धन संचालनालय (एनआरसीडी) आणि जायका (जपान इंटरनॅशनल को-ऑपरेशन एजन्सी)च्या मदतीने ९९० कोटी रुपयांचा प्रकल्प हाती घेण्यात आला आहे. त्यासाठी फेब्रुवारी २०१५ मध्ये या तिन्ही संस्थांमध्ये त्रिसदस्यीय करार झाला. त्यानुसार पुणे शहरात दररोज ३९६ दशलक्ष लिटर पाण्यावर प्रक्रिया करण्यासाठी ११ ठिकाणी नव्याने सांडपाणी प्रकल्प उभारण्यात येणार आहेत.
त्यासाठी केंद्र सरकारकडून एकूण प्रकल्प खर्चाच्या ८५ टक्के म्हणजे ८४१ कोटी रुपयांचे अनुदान महापालिकेला मिळणार आहे. पहिल्या टप्प्यात प्रकल्पांतर्गत चार पॅकेजच्या माध्यमातून सहा ठिकाणी सांडपाणी प्रक्रिया प्रकल्प उभारणीच्या निविदा महापालिकेकडून काढण्यात आल्या आहेत. ठेकेदारांनी त्या जादा दराने भरल्याची ओरड महापालिकेकडून करण्यात येत आहे. त्यामुळे त्यावर अद्याप निर्णय झालेला नाही.
दरम्यान, काल कालवा समितीच्या बैठकीत यावर चर्चा झाली. बैठकीनंतर यासंदर्भात माहिती घेतल्यानंतर पॅकेज ८ मधील धानोरी येथील प्रकल्पासाठीची जागा प्रत्यक्षात महापालिकेच्या ताब्यात आलेली नाही. तरीदेखील तेथील कामाची निविदा काढण्यात आली आहे. पॅकेज ७ मधील वडगाव आणि वारजे या दोन ठिकाणची, तर पॅकेज ९ मधील औंध येथील बॉटेनिकल गार्डन व खराडी येथील काही क्षेत्र वगळता उर्वरित आणि बाणेर या तीन ठिकाणी प्रकल्प उभारणीसाठीच्या जागा अद्याप ताब्यात आलेल्या नाहीत, असे प्रशासनाकडून सांगण्यात आले. वास्तविक, प्रकल्पासाठीचा करार होऊन पाच वर्षे पूर्ण होत आली. तरीदेखील जागा ताब्यात घेण्यात यश आलेले नाही.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.