World Environment Day : शहर परिसरामध्ये वीस प्रजातींचे एकच झाड शिल्लक

हिंगणबेट

शास्त्रीय नाव : बॅलॅनायटिस इजिप्शिया

ठिकाण : बोपदेव घाट रस्ता, जाल मेहता फाउंडेशन हॉस्टेल, कोंढवा

कोरड्या प्रदेशात आढळणारा, लहान वृक्ष. फांद्या जाड, उभ्या. काटेरी. पाने जोडीने, अरुंद, राठ. फुले १ सेंमी, सुगंधी, हिरवी. फळे ४-५ सेंमी, लांबट गोल, पिवळी, चिकट डिंक असणारी.

महत्त्व : फळांमध्ये औषधी गुणधर्म.

गोंदण

शास्त्रीय नाव : कॉर्डिया सायनेनसिस

ठिकाण- स्वारगेट बसडेपोच्या दारात, शंकरशेठ रस्ता

कोरड्या प्रदेशात आढळणारा मध्यम उंचीचा सदाहरित वृक्ष. फांद्या लोंबणाऱ्या. पाने ५-८ सेंमी, लांबट, फुले छोटी, पांढरी. फळे १ सेंमी, गोल, केशरी, चिकट (गोंदासारखी) गराची, म्हणून गोंदण

महत्त्व : याखेरीज वैशाली हॉटेल मागे एक वृक्ष आहे, पण इथला गोंदण एका पिंपळाच्या पोटातून दत्तक घेतल्यासारखा वाढला आहे.

रुद्राक्ष

शास्त्रीय नाव : इलिओकार्पस गॅनिट्रस

ठिकाण : वनदेवी मंदिरासमोरचा रस्ता, भुजबळ बागेच्या वळणावर, कर्वेनगर

हिमालयाच्या पायथ्याच्या जंगलात वाढणारा मध्यम उंचीचा सदाहरित वृक्ष. पाने १०-१५ सेंमी, लांबट. फुले छोटी, पांढरी, लांब माळेत. फळे ३ सेंमी, लांबट, निळसर काळी, गोड गराची.

महत्त्व : फळातल्या कडक बी ला धार्मिक महत्त्व.

दुरंगी बाभूळ

शास्त्रीय नाव : डायक्रोस्टॅचिस सिनेरिया

ठिकाण : मोदी गणपती मंदिराच्या मागे, नारायण पेठ

काटेरी खुरट्या जंगलात आढळणारा लहान वृक्ष. फांद्या पातळ, काटेरी. पाने संयुक्त, अगदी लहान आकाराची. फुले २-३ सेंमी, केसाळ, दुरंगी, आकर्षक. शेंगा ३-५ सेंमी, चपट्या

महत्त्व : फुले नसताना हा वृक्ष गणपतीला प्रिय असणाऱ्या शमीसारखा दिसतो.

टेटू

शास्त्रीय नाव : ओरोक्झायलम इंडिकम

ठिकाण-ताथवडे उद्यानासमोर, कर्वेनगर

दमट पानगळीच्या जंगलात आढळणारा मध्यम उंचीचा वृक्ष. पाने संयुक्त, खूप मोठी. फुले गुलाबी, मोठी, उग्र वासाची, फांदीच्या टोकाला मोठ्या गुच्छात रात्री उमलतात.

महत्त्व - शेंगा मोठ्या तलवारी सारख्या लटकतात, वाऱ्यात आपटून तडकतात आणि कागदी बिया सांडतात.