Pune News : स्पर्धा परीक्षेची तयारी करणाऱ्या युवतीने वसतिगृहात संपविले जीवन

पुणे - स्पर्धा परीक्षेची तयारी करणाऱ्या एका युवतीने वसतिगृहात गळफास घेऊन आत्महत्या केली. गुरुवार पेठेतील एका वसतिगृहात सोमवारी सकाळी ही घटना घडली. तिच्या शरीरावर मारहाणीच्या जखमा आढळल्याने संशय व्यक्त करण्यात येत आहे.

अभिलाषा महेंद्र मित्तल (वय २७, रा. गुरुवार पेठ, मूळ रा. जालना) असे युवतीचे नाव आहे. या प्रकरणी खडक पोलिसांनी वसतिगृह चालक सुनील परमेश्वर महानोर (वय २८) या संशयितांविरुद्ध गुन्हा दाखल केला आहे. वरिष्ठ पोलिस निरीक्षक रवींद्र गायकवाड यांनी दिलेल्या माहितीनुसार, अभिलाषा एम.एस्सी. उत्तीर्ण असून, ती स्पर्धा परीक्षेची तयारी करीत होती.

सोमवारी सकाळी वसतिगृहातील खोलीत तिने गळफास घेऊन आत्महत्या केली. तिच्या मैत्रिणींनी दरवाजा ठोठावला. परंतु तिने प्रतिसाद न दिल्याने या घटनेची माहिती पोलिसांना दिली. पोलिसांनी दरवाजा तोडून आत प्रवेश केला. त्यावेळी तिने गळफास घेतल्याचे आढळून आले.

या प्रकरणी वसतिगृह चालक सुनील महानोर याच्याविरुद्ध गुन्हा दाखल केला आहे. महानोर देखील स्पर्धा परीक्षेची तयारी करीत वसतिगृह चालवत होता. तिचा महानोरशी वाद झाला होता. तिच्या हाता-पायावर जखमा झाल्याचे आढळून आले आहे. शवविच्छेदन अहवालात मृत्यूचे कारण स्पष्ट होईल, असे वरिष्ठ निरीक्षक गायकवाड यांनी सांगितले.