मासेमारी करताना बुडून तरुणाचा मृत्यू

मंचर - महिनाभरापासून अपघातात गंभीर जखमी असलेल्या महेश राजेंद्र शिंदे-भोई (वय २५) या भावाच्या उपचारासाठी घरच्यांना आर्थिक हातभार लागावा, या उद्देशाने मंचर (ता. आंबेगाव) येथे अण्णासाहेब आवटे महाविद्यालयाच्या तलावात मासेमारी करीत असताना गणेश राजेंद्र शिंदे-भोई (वय २८, रा. कळंब, ता. आंबेगाव) या तरुणाचा पाण्यात बुडून मृत्यू झाला. बुधवारी (ता. २३) रात्री ही घटना घडली. 

या दुर्घटनेमुळे कळंब येथील शिंदे कुटुंबावर दुःखाचा डोंगर कोसळला आहे. गणेश हा पोहण्यामध्ये तरबेज होता. मंचर पोलिसांच्या वतीने गणपती विसर्जनाच्या काळात घोड नदीच्या पात्रात त्याची नेमणूक केली जात असे. तसेच, विहिरीत किंवा पाण्यात बुडालेले मृतदेह शोधून देण्याचे कामदेखील
तो सहजतेने करीत असे. बुधवारी रात्री आवटे महाविद्यालयाच्या आवारात असलेल्या तलावात मासे पकडण्यासाठी गणेशने जाळे टाकले होते. जाळे पाण्याबाहेर काढत असताना त्याचा पाय जाळ्यात अडकून तो पाण्यात पडला.

त्यामुळे पाण्यात बुडून त्याचा मृत्यू झाला. मंचर पोलिस ठाण्याचे पोलिस हवालदार सुधाकर जाधव व एस. बी. मडके यांनी घटनास्थळी भेट देऊन रीतसर पंचनामा केला आहे. मंचर उपजिल्हा रुग्णालयात शवविच्छेदन केल्यानंतर मृतदेह नातेवाइकांच्या ताब्यात देण्यात आला. गणेशचा मृत्यू व दुसरा मुलगा महेश गेल्या महिन्यात गंभीर जखमी झाला आहे. त्याच्यावर पुणे येथे उपचार सुरू आहे. शिंदे कुटुंबाची आर्थिक परिस्थिती बिकट आहे. दुहेरी संकटामुळे राजेंद्र शिंदे यांचे कुटुंब खचून गेले आहे.