उधारीवर बिअर दिली नाही म्हणून बहाद्दरांनी बिअर शॉपीच फोडली; वानवडीतील घटना

पुणे : दारु विक्रेत्याने उधारीवर बिअर दिली नाही म्हणून तरुणांनी एका बिअर शॉपीसह त्याच्याशेजारील मेडीकलची तोडफोड करीत तेथील गल्ल्यातील पैसे चोरुन नेले. ही घटना काळेपडळ येथे रविवारी सायंकाळी घडली. याप्रकरणी वानवडी पोलिसांनी एकाला अटक केली असून चौघांविरुद्ध गुन्हा दाखल करण्यात आला आहे. 

प्रतीक ऊर्फ नन्या नवनाथ शेंडे (वय.18, काळेपडळ हडपसर) असे अटक केलेल्या संशयित आरोपीचे नाव आहे. त्याच्यासह चौघांविरुद्ध वानवडी पोलिस ठाण्यात गुन्हा दाखल करण्यात आला आहे. तसेच तीन अल्पवयीन मुलांना पोलिसांनी ताब्यात घेतले आहे. याप्रकरणी सुरज सुतार (वय.22,रा. काळेपडळ) यांनी फिर्याद दिली आहे.

- गाव कारभाऱ्यांचं नवं आरक्षण ठरलं; तहसीलदारांच्या बैठकीत सोडतीद्वारे झाला निर्णय​

पोलिसांनी दिलेल्या माहितीनुसार, फिर्यादी सुतार हा श्री मेडीकल नावाच्या औषध विक्री दुकानामध्ये काम करतो. या मेडिकलच्या शेजारीच बिअर शॉपी आहे. रविवारी सायंकाळी सहा वाजता आरोपी शेंडे हा दारु घेण्यासाठी तेथे आला. त्याने तेथील विक्रेत्यास उधारीवर बिअर मागितली. परंतु त्याने नकार दिला. त्यावेळी आरोपी शेंडेने त्यास शिवीगाळ केली. तसेच त्याच्या साथीदारांना बोलावून हातातील दांडक्‍याने दुकानातील फर्निचर तोडले. लोखंडी कोयत्याने फ्रिज, काऊंटरची तोडफोड केली. हा प्रकार सुरू असताना फिर्यादी मेडीकल अर्धे बंद करुन तेथे थांबला होता.

- मोठी बातमी: शिक्षण सेवक भरतीला राज्य सरकारचा हिरवा कंदील; 6 हजार जागांसाठी होणार भरती​

आरोपीने त्यास 'तू काय इथे उभा राहून तमाशा बघतोय काय' असे म्हणत त्याच्या मेडीकलचीही तोडफोड केली. तसेच मेडीकलच्या गल्ल्यातील तीन हजार 800 रुपयांची रोकड काढून घेतले. फिर्यादीने त्यांना विरोध केल्यानंतर आरोपींनी त्यास उलट्या कोयत्याने मारहाण केली. याबरोबर शेजारील कटिंग सलून, चिकन सेंटरचे दुकानही फाडले. अचानक झालेल्या या तोडफोडीच्या घटनेने नागरीकही घाबरले. त्यानंतर व्यावसायिकांनी आपली दुकाने बंद केली.

- पुण्याच्या बातम्या वाचण्यासाठी येथे ► क्लिक करा

(Edited by: Ashish N. Kadam)