Black Money: सरकारी तिजोरीत सापडला ₹2000 च्या नोटांचा खजिना, सोन्याच्या बिस्किटावर लिहिलंय स्वित्झर्लंड

Black Money: राजधानी जयपूरमधील सचिवालयापासून काही पावलांच्या अंतरावर 2.31 कोटी रुपयांहून अधिक काळा पैसा मिळाल्याची बाब चर्चेत आहे.

विशेष म्हणजे ज्या दिवशी रिझर्व्ह बँक ऑफ इंडियाने (RBI) 2000 रुपयांच्या नोटा चलनातून बाद करण्याचा निर्णय घेतला, त्याच दिवशी माहिती आणि तंत्रज्ञान विभाग (DOIT) कार्यालयात ठेवलेल्या कपाटातून ही रक्कम जप्त करण्यात आली.

कपाटात सापडलेल्या या रकमेत 2000 च्या 7,298 नोटा म्हणजेच एक कोटी 45 ​​लाख 96 हजार रुपयांचा समावेश आहे. याशिवाय 500 च्या 17 हजार 107 नोटा सापडल्या ज्याची किंमत 85 लाख 53 हजार 500 रुपये आहे.

यासोबतच एक किलो वजनाची सोन्याचे बिस्कीटेही सापडली आहे. त्यावर 'मेड इन स्वित्झर्लंड' असे लिहिले होते. बाजारभावानुसार सोन्याची किंमत सुमारे 62 लाख रुपये असेल.

प्रत्यक्षात या विभागात कागदपत्रांचे डिजिटायझेशन करण्याची प्रक्रिया सुरू आहे. दरम्यान, शुक्रवारी विभागाच्या कार्यालयात ठेवलेल्या कपाटाची चावी सापडली नाही.

हे पाहून डीओआयटीच्या अधिकाऱ्यांनी तंत्रज्ञांना बोलावून कुलूप तोडले. कपाट उघडल्यावर त्यांना फायलींव्यतिरिक्त कपाटात एक संशयास्पद बॅग ठेवलेली दिसली. डीओआयटीच्या अतिरिक्त संचालकांनी पोलिसांना ही माहिती दिली.

जयपूर शहराचे पोलिस आयुक्त आनंद श्रीवास्तवही यावेळी पोहोचले. बॅग उघडली असता त्यामधून 2.31 कोटी रुपये रोख आणि एक किलो वजनाच्या सोने सापडले आहे.

आता या प्रकरणी जयपूर शहर पोलिसांनी आतापर्यंत 6 जणांना ताब्यात घेतले असून हा काळा पैसा कोणाचा आहे हे शोधण्याचा प्रयत्न करत आहेत.

इंडिया टुडेने सांगितले की, प्राथमिक तपासात असे दिसून आले आहे की काळा पैसा हा सरकारी अधिकाऱ्यांचा आहे. त्यांनी कपाटात पैसे लपवून ठेवले होते.

काही महिन्यांपूर्वी ज्या कंत्राटदारांना निविदा वितरित करण्यात आल्या होत्या त्यांच्यामार्फत ही रक्कम घेण्यात आली होती. मात्र, नेमका तपशील अद्याप समजू शकलेला नाही.