Bank Fraud Case: आणखी एक बँक घोटाळा, 1,964 कोटींच्या फसवणुकीप्रकरणी सीबीआयने दाखल केला गुन्हा

Visa Power Bank Fraud Case: केंद्रीय अन्वेषण ब्युरो (CBI) ने 1,964 कोटी रुपयांच्या कथित बँक फसवणुकीप्रकरणी Visa Power Ltd आणि त्याचे तत्कालीन अध्यक्ष विशंभर सरन यांच्याविरुद्ध एफआयआर दाखल केला आहे. अधिकाऱ्यांनी गुरुवारी ही माहिती दिली.

अधिका-यांनी सांगितले की एजन्सीने पंजाब नॅशनल बँकेच्या (PNB) तक्रारीवरून ही कारवाई सुरू केली, 14 कर्जदारांची 1,964 कोटी रुपयांचे मुदत कर्ज मंजूर केले होते. पीएनबी ही या टाय-अपसाठी आघाडीची बँक होती आणि तिने 394 कोटी रुपयांचे कर्ज मंजूर केले होते.

ते म्हणाले की, बँकेने आरोप केला आहे की कंपनी आणि आरोपी अधिकारी - चेअरमन सरन आणि संचालक विकास अग्रवाल आणि सुब्रतो त्रिवेदी यांनी छत्तीसगडमधील रायगड येथे 1,200 मेगावॅट क्षमतेच्या कोळशावर आधारित थर्मल पॉवर प्रकल्पाच्या विकासासाठी कर्जासाठी बँकेशी संपर्क साधला.

काय आहे संपूर्ण प्रकरण?

एफआयआरमध्ये विकास अग्रवाल आणि सुब्रतो त्रिवेदी यांच्यावर आरोप करण्यात आले आहेत. एफआयआरनुसार, "असे कळले आहे की आरोपींनी एकमेकांशी संगनमत करून आणि गुन्हेगारी कट रचून एनपीएच्या तारखेपासून बँकांचे 1,964 कोटी रुपयांचे आणि व्याजाचे नुकसान केले आहे."

हा प्रकल्प प्रत्येकी 600 मेगावॅटच्या दोन टप्प्यांत राबवला जाणार होता आणि कर्जदारांद्वारे वित्तपुरवठा केला जाणार होता. पण तो प्रकल्प पूर्ण होऊ शकला नाही.

पीएनबीच्या तक्रारीत म्हटले आहे की, “आरोपींनी सार्वजनिक क्षेत्रातील बँकांविरुद्ध (पीएसबी) फसवणूक करण्याचा कट रचला आहे आणि भारतीय दंड संहितेच्या विविध तरतुदींनुसार विविध गुन्हे केले आहेत. त्यांनी सांगितले की, पीएनबीने आरोपींविरुद्ध 'लूक आउट सर्क्युलर' आधीच जारी केले आहे.