HDFC Bank : ‘एचडीएफसी’ला १६,५१२ कोटींचा नफा; बँकेतर्फे भागधारकांसाठी १९.५० रुपये लाभांश जाहीर

मुंबई : एचडीएफसी बँकेने आर्थिक वर्ष २०२३-२४ मधील जानेवारी-मार्च तिमाहीत १६,५१२ कोटी रुपयांचा निव्वळ नफा मिळवला आहे. डिसेंबर तिमाहीत बँकेने १६,३७३ कोटी रुपयांचा नफा मिळवला होता.

बँकेने मार्च तिमाहीत १७,२५७ कोटी रुपयांचा एकत्रित नफा मिळवला असून, डिसेंबर तिमाहीच्या तुलनेत त्यात दोन टक्के वाढ झाली आहे. बँकेने आज तिमाही आर्थिक निकाल जाहीर केले, त्यावेळी ही माहिती देण्यात आली. बँकेच्या संचालक मंडळाने ३१ मार्च २०२४ रोजी संपलेल्या वर्षासाठी प्रति शेअर १९.५० रुपये लाभांशाची शिफारस केली आहे.

जुलैमध्ये एचडीएफसी बँके आणि तिची मूळ कंपनी गृहनिर्माण विकास वित्त महामंडळ यांचे विलीनीकरण झाले, त्यामुळे वार्षिक आधारावर तुलनात्मक आकडेवारी देता येत नाही, असेही बँकेने म्हटले आहे.

बँकेची एकूण थकीत कर्जांचे प्रमाण (एनपीए) ३१,३७३ कोटी, तर निव्वळ ‘एनपीए’ ८,०९१ कोटी रुपये आहे. एचडीएफसी क्रेडिला फायनान्शिअल सर्व्हिसेसमधील शेअरच्या विक्रीतून झालेल्या ७,३४० कोटींच्या व्यवहारातील नफ्यासह बँकेचा निव्वळ महसूल ४७,२४० कोटींवर पोहोचला आहे.

आर्थिक वर्ष २३-२०२४ साठी, बँकेने ६४,०६० कोटी रुपये नफा नोंदवला आहे बँकेचे मूळ निव्वळ व्याज उत्पन्न तिमाहीत २९,०८० कोटी रुपये आहे, तर इतर उत्पन्न वाढून १८,१७० कोटी रुपये आहे.

कर्जदात्याने एकूण मालमत्तेवर ३.४४ टक्के कोअर नेट इंटरेस्ट मार्जिन नोंदवले आहे. बँकेने संभाव्य बुडीत कर्जाविरूद्ध उच्च तरतुदी केल्या असून, कर्ज मार्जिन स्थिर आहे. बँकेने या तिमाहीसाठी १३,५०० कोटी रुपयांच्या तरतुदी केल्या असून, त्यात १०,९०० कोटी रुपयांच्या फ्लोटिंग तरतुदींचा समावेश होता, असे बँकेने म्हटले आहे.

मार्च तिमाहीत बँकेच्या एकूण शाखांची संख्या ८,७३८ झाली असून, बँकेने या कालावधीत नव्या ६५० शाखा उघडल्या. आर्थिक वर्ष २०२५ मध्ये शाखांची संख्या १२ हजारांहून अधिक करण्याचे बँकेचे उद्दिष्ट असल्याचे बँकेचे मुख्य वित्तीय अधिकारी श्रीनिवासन वैद्यनाथन यांनी सांगितले.