Tata Group IPO : टाटा समूहाचा आणखी एक आयपीओ येण्याची शक्यता ; इलेक्ट्रिक वाहन कंपनीची बाजारात नोंदणी होणार

मुंबई : टाटा समूह आपली इलेक्ट्रिक वाहन उत्पादक कंपनी टाटा पॅसेंजर इलेक्ट्रिक मोबिलिटी लि. ची (टीपीईएमएल) शेअर बाजारात नोंदणी करण्याचा विचार करत आहे. या व्यवसायातील गुंतवणूकीतून कमाई करण्याचे कंपनीचे उद्दिष्ट आहे.

येत्या १२ ते १८ महिन्यांत या कंपनीचा आयपीओ येण्याचा अंदाज वर्तविला जात आहे. या द्वारे एक ते दोन अब्ज डॉलरचा निधी उभारण्याचा कंपनीची योजना असेल. टाटा मोटर्स ही उपकंपनी देशातील सर्वांत मोठी इलेक्ट्रिक वाहने उत्पादक कंपनी आहे.

ही कंपनी नेक्सॉन ईव्ही आणि टियागो ईव्हीसारख्या सर्वाधिक विक्रीच्या मोटारी बनवते. इलेक्ट्रिक मोटारींच्या बाजारपेठेत तिचा ८० टक्क्यांहून अधिक हिस्सा आहे. या कंपनीमध्ये खासगी गुंतवणूक सर्वाधिक आहे.

जानेवारी २०२३ मध्ये अमेरिकेतील खासगी गुंतवणूकदार टीपीजीकडून एक अब्ज डॉलरचा निधी मिळवला आहे. वर्ष २०२६ पर्यंत दोन अब्ज डॉलरची गुंतवणूक करण्याची कंपनीची योजना आहे. कंपनीचे मूल्य ९.५ ते १० अब्ज डॉलर आहे.