दलबदलूंचे अभंग! (ढिंग टांग)

आपुलिया बळे। नाही मी बोलत ।
आहे जे नियत। तेचि घडे ।।

पंचमीचे रंगी। रंगलो सचैल ।
झालो थोडे सैल। धुळवडीत ।।

आता रंगी ऐश्‍या। न्हालो मन:पूत ।
चढले की भूत। इलेक्‍शनी ।।
 
आम्ही तो बापुडे। द्यावे आम्हा मत ।
आमुची रयत। मायबाप ।।

कसली पक्षनिष्ठा। मूल्येबिल्ये काय ।
गेले दोन पाय। नाकामधी ।।

आम्ही न करितो। विचारबिचार ।
आम्हा मतदार। देव आहे ।।

आज होतो येथे। उद्या तेथे असू ।
परवा कुठे बसू। नाही ठावे ।।

अद्वैताचे रंग। ऐसे भेटतात ।
सर्व प्राणिजात। आपुलेचि ।।

इलेक्‍शनकाळी । पक्षांची वारुळे ।
भूमीखाली बिळे । सटकाया ।।

आम्ही भूमिगत। बिळातले हिरे ।
किंवा सर्पंचरे। म्हणा तुम्ही ।।
 
आम्ही तो कुक्‍कुट। पाहुनिया वात ।
करु कन्नीकाट । संधी येता ।।

वाहणारे वारे । हेरुनिया चोख ।
बदलावा रोख । आपुलाही ।।

कुंपणाचे वरी । हाले सरडोका ।
दृष्टीला गे धोका । त्याला देऊ ।।

रंगबदलाचा । आमुचा हुन्नर ।
थक्‍क यक्षकिन्नर। पाहोनिया ।।

ऐसे काही येर । बदलू आम्ही रंग ।
बघोनिया दंग । होतील की ।।

पावसात फुटे । बेडकांचे पेव ।
तोचि खरा देव । आमुचा हो ।।

घटकेत तीर । कमळाचे पान ।
किंवा हात छान । कोणाचाही ।।

मारु उड्या आम्ही । जमेल तितुक्‍या ।
म्हणा बोंबिलभिक्‍या । आम्हालागीं ।।

पक्षनिष्ठेपायी । किती होते बोअर ।
दिल मांगे मोअर । आमुचे बा ।।

एका पक्षामध्ये । रहावे किती नीट ।
ह्यास काही लिमिट । असते ना? ।।

इलेक्‍शनालागी । असे सर्व काही ।
सारे ‘तोचि’ पाही । वरोनिया ।।

नंदी म्हणे ऐशा । अलौकिक नरां ।
महाग पैजारा । नका मारु ।।

ऐशा दलबदलूंना । द्यावा जमालगोटा ।
त्यासाठी बा ‘नोटा’ । आहे आहे ।।