ढिंग टांग : तथास्तु!

Dhing Tang
Dhing Tang

स्थळ : मातोश्री हाइट्‌स, वांद्रे बुद्रुक. 
वेळ : आशीर्वादाची. 
काळ : शुभेच्छांचा. 
प्रसंग : पवित्र. 
पात्रे : अगदीच पवित्र! 

विक्रमादित्य : (प्रवासी पोशाखात) हाय देअर बॅब्स...मी निघालो! सी यु अगेन!! 
उधोजीसाहेब : (लक्ष न देता) संध्याकाळी सातच्या आत घरात आलं पाहिजे हं! शिस्त म्हंजे शिस्त!! 
विक्रमादित्य : (ब्यागेचे कुलुप लावत) नॉट पॉसिबल!! आय विल बी औटॉफस्टेशन!! 
उधोजीसाहेब : (लाइटली घेत) बांदऱ्यापलीकडे आपण जातो कुठे? फार तर माहीम!! ये लौकर!! 

विक्रमादित्य : (सॅक पाठीला लावत) भेटू महिनाभराने! बाय!! 
उधोजीसाहेब : (हादरुन) हे काय? कुठे निघालास? 
विक्रमादित्य : (गॉगल सारखा करत) उंबऱ्याबाहेर पडणाऱ्या माणसाला 'कुठे निघालास' असं विचारु नये! कामं होत नाहीत!! 
उधोजीसाहेब : (आणखी हादरुन) तू कामाला निघाला आहेस? 
विक्रमादित्य : (पाठीवरली सॅक ठीकठाक करत) येस्स...महत्त्वाच्या कामाला! 
उधोजीसाहेब : (संशयानं) वीकेंड जवळ येतोय! तू कुठे ट्रेकिंगला जात नाहीएस ना? 

विक्रमादित्य : (हसून) ट्रेकिंग? हॅ:!! महाराष्ट्रातले सगळे गड सर करुन झालेत माझे!! आता कसलं ट्रेकिंग? 
उधोजीसाहेब : (डोळे बारीक करत) पावसाळी पिकनिकला निघालास की काय? 
विक्रमादित्य : (आरशात डोकावत) मी यात्रेला निघालोय! 
उधोजीसाहेब : (प्राणांतिक दचकून) यात्रा? अरे, यात्रेला जायचं वय आहे का तुझं? 
विक्रमादित्य : (सुविचार सांगत) यात्रेनं पुण्य मिळतं!! 
उधोजीसाहेब : (कासावीस होत) तुला कशाला इतक्‍यात हव्यात पुण्याईच्या उठाठेवी? यात्रा निवृत्त माणसं करतात!! 
विक्रमादित्य : (गंभीर सुरात) लोकांचे आशीर्वाद घेत, पुण्य गाठीला बांधत माझी यात्रा मी कम्प्लीट करीन! मगच परत येईन!! 
उधोजीसाहेब : (चाचपणी करत) कुठे हिमालयात गुहेतबिहेत जाऊन बसणार नाहीस ना? केदारनाथला हल्ली गुहांना जाम डिमांड आहे, म्हणून विचारतोय!! 

विक्रमादित्य : (खंबीरपणाने) मी जळगावला चाललोय! तिथल्या गणपती मंदिरात वंदन करुन मी माझ्या यात्रेला आरंभ करणार आहे!! 
उधोजीसाहेब : (आमिष दाखवत) जळगावला कुणी यात्रेला जातं का? वेडा कुठला!! 
विक्रमादित्य : (निग्रहपूर्वक) काशीयात्रेपेक्षा अधिक पुण्य माझ्या यात्रेत आहे, बॅब्स! बघालच तुम्ही!! 
उधोजीसाहेब : (अजीजीनं) तुझ्यासाठी काय काय बेत रचले आहेत मी! यात्रेला कसला जातोस? तुझं सगळं बस्तान बसलं की मग मीच यात्रेला जायचं म्हणतोय!! 
विक्रमादित्य : (गंभीर आवाजात) तुम्हीसुध्दा यात्रा प्लान करताय? 
उधोजीसाहेब : (गुळमुळीत) तसा मध्यंतरी मी अयोध्येच्या यात्रेला जाऊन आलोय! पण...सध्या तेवढं पुरेसं आहे!! 

विक्रमादित्य : (युक्‍तिवाद करत) ती यात्रा वेगळी, ही वेगळी! 
उधोजीसाहेब : (समजूत काढत) आपल्यासारख्या नेत्यांनी मोर्चे काढावेत, दौरे काढावेत! अभियान का काय म्हंटात...ते काढावं! हे...हे...हे...काय? 
विक्रमादित्य : (दोन्ही हात उडवत) कुणी सत्यदेव म्हणतात, कुणी सत्यनारायण! शेवटी सगळ्यांचा हेतू एकच! जनांचा आशीर्वाद!! 
उधोजीसाहेब : (सावधगिरीने) नेमकी कुठे आहे तुझी ही यात्रा? 
विक्रमादित्य : (भाबडेपणाने) ज्या लोकांनी आपल्याला मतं दिली, त्यांना 'थॅंक्‍स' म्हणायचंय! ज्यांनी दिली नाहीत, त्यांची मनं वळवायची आहेत आणि जे देणारच नाहीएत त्यांना... 
उधोजीसाहेब : (थिजून) ही तुझी जनआशीर्वाद यात्रा? 
विक्रमादित्य : (अभिमानाने) येस्स!! फक्‍त एकच समस्या आहे! विचारू? 
उधोजीसाहेब : (नाइलाजाने) विचार आता...काय करणार? 
विक्रमादित्य : (एक पॉज घेत) जनआशीर्वाद यात्रेत आपण आशीर्वाद घ्यायचे की द्यायचे असतात?

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Esakal Marathi News
www.esakal.com