ढिंग टांग  :  रॉकस्टार आणि तात्या!

भारताचे परममित्र श्रीमान ट्रम्पतात्या आणि भारताचे फादर श्रीमान नमोजी यांच्यात बंद दाराआड चाललेल्या संवादात अनेक प्रश्‍नांचा ऊहापोह करण्यात आला. या मित्र-भेटीचा तपशील सर्वांना ठाऊक नाही, कारण सदर संवाद बंद दाराआड झाला, हे वर सांगण्यात आले आहेच. तथापि, आम्ही तेथे उपस्थित असल्यामुळे आम्हाला ही चर्चा ऐकता आली. अवघ्या विश्‍वाचे पर्यावरण व भविष्य या संवादावर अवलंबून होते. संवादातला अंश येथे देत आहोत. त्यावरून ही भेट किती महत्त्वाची होती, हे तुमच्या लक्षात येईल.

ट्रम्पतात्या : हौडी मोदी!

नमोजी : हौडी डोनाल्डभाई!

ट्रम्पतात्या : जाम मायलेज मारता हां तुम्ही! 

नमोजी : (संकोचून) कसलं मायलेज?

ट्रम्पतात्या : (दाद देत) मानलं पायजे तुम्हाला! ज्यात त्यात मायलेज मारता!! 

नमोजी : (विनम्रतेने) कसचं कसचं! मी एक साधासिंपल चहावाला आहे! एकसो तीस करोड भारतवासीयों के बिना ये अकेला नमोजी कुछ नहीं!

ट्रम्पतात्या : (ओठांचा चंबू करत) अंहं! बनो मत...परवा ह्यूस्टनला काय जोरदार कार्यक्रम केलात! 

नमोजी : लोक प्रेम करतात आपल्यावर! काय करणार?

ट्रम्पतात्या : (खांद्यावर थाप मारत) तुम्ही तर रॉकस्टार आहात! तुम्ही इंडियाचे एल्विस प्रिस्ले आहात!!

नमोजी : कोण एल्विस?

ट्रम्पतात्या : प्रिस्ले, प्रिस्ले!!

नमोजी : (विषय बदलत) असू दे, असू दे! मायकेल जॅक्‍सन म्हटलं नाहीत त्याबद्दल थॅंक्‍यू! बाकी तुम्ही त्या पाकिस्तानवाल्यांना झापलंत, त्याबद्दलही थॅंक्‍यू हं!

ट्रम्पतात्या : झापलं? छे!! मी तर सहज बोललो होतो! मी असंच बोलतो!! इमरॅनसुद्धा माझा चांगला फ्रेंड आहे! परवाच त्याची फ्रेंड रिक्‍वेस्ट मी फेसबुकवर ॲक्‍सेप्ट केली! 

नमोजी : (हळहळत) पुलवामा हल्ल्यानंतर मी त्यांना ब्लॉक करून टाकलं! फार वाईट पोस्टी टाकत होते!! (विषय बदलत) ते जाऊ दे! बाकी परवाचा आपला इव्हेंट सुपरहिट गेला हे मात्र खरं!

ट्रम्पतात्या : तुम्ही खरोखर बापमाणूस आहात! पुढल्या वेळेला मीसुद्धा असा इव्हेंट करून बघणार आहे!

नमोजी : एक मोफत सल्ला देतो! असा इव्हेंट स्वत:च्या देशात करायचा नसतो! परदेशात जाऊन करावा! 

ट्रम्पतात्या : त्यानं काय होईल!

नमोजी : गर्दी...गर्दी होईल! पिकतं तिथं विकत नसतं! तुम्ही ‘आर्ट ऑफ डील’मध्ये माहीर आहात! धंद्याची बात मी तुम्हाला काय सांगावी?

ट्रम्पतात्या : मी तर तुम्हाला फादर ऑफ इंडिया म्हणेन!

नमोजी : (दचकून) फादर?

ट्रम्पतात्या : येस...फादरच! खरं तर ग्रॅंण्ड फादर म्हणणार होतो!

नमोजी : थॅंक्‍यू! आय मीन...न म्हटल्याबद्दल!

ट्रम्पतात्या : रॉकस्टार फादर एल्विस प्रिस्ले! हाहा!!

नमोजी : (प्रसंगावधान राखून) तुम्हीही इंडियात आलात की आपण असाच जोरदार कार्यक्रम करू!

ट्रम्पतात्या : इथे अडीच कोटी इंडियन राहतात! तुमच्या इंडियात अमेरिकन किती असणार?

नमोजी : एकशेतीस कोटी अमेरिकन राहतात असं समजा! आमच्या भारतात तुमची क्रेझ सॉलिड आहे! उगीच नाही लोक तुम्हाला तात्या म्हणत!!

ट्रम्पतात्या : तात्या म्हंजे काय?

नमोजी : तात्या म्हणजे रॉकस्टारच!!

ट्रम्पतात्या : अस्सं होय! म्हणजे मीसुद्धा रॉकस्टार आहे?

नमोजी : अफकोर्स! ठरलं तर...तुम्ही मला रॉकस्टार फादर एल्विस प्रिस्ले म्हणालात त्याबद्दल मी तुम्हाला ‘ग्लोबल तात्या’ असा किताब देईन! डील?