ढिंग टांग : हटाव हिंदी, हटाव चिंधी..!

दादू : (बंधुप्रेमाचा उमाळा दाटून येत) म्यांव म्यांव…पर्रर्रर्र..! सदू : (नेहमीच्या विनम्रतेने) ए, कोणॅय?दादू : (खेळीमेळीने) सदूराया, आज माझा आवाज ओळखला नाहीस? कशी केली एका माणसाची गंमत! सदू : (घुश्शात) म्यांव म्यांव ही आमची भाषा नव्हे! आमची भाषा मराठी!! .दादू : (अजूनही खेळीमेळीने) मीही मराठीतच म्यांव म्यांव केलं!सदू : (गंभीरपणाने) हे पहा, मी भयंकर सीरिसस मूडमध्ये आहे! टोमणे, विनोद वगैरे काहीही नको!! आत्ताच शालेय शिक्षणमंत्री दादा भुसे माझ्याकडे येऊन गेले…दादू : (कडूझर चेहरा करत) गद्दारांचं नाव घेऊ नकोस! कशाला कडमडले होते ते?सदू : (मानभावीपणाने) त्रिभाषा सूत्र मला समजावून देत होते! मी म्हटलं गेलं उडत तुमचं ते त्रिभाषा सूत्र! पहिलीच्या पोरांच्या दप्तरात हिंदीची पुस्तकं दिसली तर मी तुमच्या दप्तरात दगडं टाकीन!.दादू : (खुशीत येत) शाब्बास! आलाय मोठा शालेय शिक्षणमंत्री! हिंदीची सक्ती, महाराष्ट्रात कंबख्ती, हे अजून त्यांना कळलेलं नाही! एकदा ‘मातोश्री’वर येऊ दे, दाखवतो इंगा!सदू : (थंडगार आवाजात) तू काय इंगा दाखवणार! माझ्याकडेच आले आणि तळहात बगलेत दाबून गेले!दादू : (काहीही न कळून) का बुवा?सदू : (शांत आवाजात) मी मोजून वीस छड्या मारल्या!दादू : (खोट्या खोट्या सुरात) हिंदीसक्ती नही चलेगी, नही चलेगी! हिंदी हटाव, चिंधी हटाव! मराठी उद्गार बचाव, मराठी गद्दार हटाव!!सदू : (खदखदत्या सुरात) कृपया मराठीत बोला!.दादू : (वैतागून) अरे हो रे बाबा! आलाय मोठा!! आम्ही मराठीचे मारक आणि तुम्ही एकटे तारक आहात काय? हिंदीसक्ती के खिलाफ हमनें भी आंदोलन छेडा है, समझे क्या?सदू : (तावातावाने) हिंदी सक्ती नसतानाही खालीपिली हिंदी में कायकू बोलताय? तुमकू हिंदी पिक्चर बहोत अच्छे लगते है ना!!दादू : (अभिमानाने) आख्खं बॉलिवुड आम्ही सांभाळलंय मिस्टर!!सदू : (दुप्पट अभिमानानं) माझ्यामुळे मराठी सिनेमांना मल्टिप्लेक्सचे शो मिळायला लागले हे विसरु नकोस! मलाही सिनेमाचा शौक आहे, बट नॉट ॲट द कॉस्ट ऑफ मराठी भाषा!!.दादू : (स्वत:चं हिंदी प्रेम सांगत) ….वेळ मिळाला की मी हिंदी सिनेमा बघतोच! हल्ली तर दोन-दोन सिनेमे बघतो!! नाना पाटेकरांचा ‘प्रहार’ बघितलाय ना? त्यातला डायलॉग मी मध्यंतरी भाषणात मारला होता…सदू : (हिणवत) हुं:! म्हणे कमॉन किल मी!! हिंदी सिनेमातला इंग्लिश डायलॉग!! मराठीचा पत्ता नाही!दादू : (निर्धाराने) हिंदी सक्ती ही भाषिक आणीबाणी आहे, असं मी जाहीर केलंय! हिंदी सक्तीविरोधात आम्ही आंदोलन करणार आहोत!सदू : (हिरीरीनं) आंदोलन आम्ही करणार! सहा जुलैला गिरगावात मोर्चा काढणार!.दादू : (नेहले पे देहला) आम्हीसुद्धा मोर्चा काढू!! हिंदी सक्ती हा राजकारणाचा विषय नाही, उलट प्रत्येक पक्षानं या आंदोलनात सहभागी व्हायला हवं!सदू : (करडेपणाने) आमचाही मोर्चा सर्वपक्षीयच आहे म्हटलं! तुम्ही येताय ना?दादू : (पूर्वअट घालत) तू आमच्या मोर्चाला आलास तरच!!सदू : (निषेधाच्या सुरात) मोर्चा मी आधी जाहीर केला!दादू : (ठामपणाने) आंदोलन मी छेडलं!!सदू : (छद्मीपणानं) मला वाटतं की हीच आपल्याला टाळीची संधी आहे!!दादू : (टाळी वाजवत) ये हुई ना बात!! इस बात पे दे टाळी!!.सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

ढिंग टांग : हटाव हिंदी, हटाव चिंधी..!

Related Stories