ढिंग टांग : युद्ध आमुचे सुरू...!

ढिंग टांगसदू : (सावधपणाने फोन फिरवत) म्यांव म्यांव…गुर्रर्र गुरुर्रर्र…!दादू : (बेसावधपणाने फोन फिरवत) बोला, बोकेभाऊ!! काय म्हणताय? डरकाळताय की ढेकर देताय?सदू : (रागावून) बोकेभाऊ कोणाला म्हणतोस?दादू : (साळसूदपणाने) सदूराया, तू आहेस होय! मी ओळखलाच नाही तुझा आवाज!! मला वाटलं खरंच कुठलं तरी मांजर ओरडतंय! हाहा!!सदू : (मानभावीपणाने) युरोपच्या दौऱ्यावरुन कधी आलास?.दादू : (खुशीत) कध्धीच!! येऊन कामालासुद्धा लागलो! तूसुद्धा कुठेतरी परदेशी गेला होतास ना?सदू : (हळू आवाजात) बाली बेटांवर गेलो होतो! पण लगेच परत आलो!! कसा झाला युरोपचा दौरा?दादू : (खुशीत) मस्त! चिक्कार हिंडलो!!सदू : (टोमणा मारत) तिथं बरा हिंडतोस! इथं घरातून बाहेर पडणं तुला शिक्षेसारखं वाटतं…हो ना?दादू : (रागावून) खामोश! काहीही बोलू नकोस! मी इथेसुद्धा खूप फिरतो! परवाच भिवंडीला जाऊन आलो!सदू : आपण नव्हतो त्या काळात काय काय घडलं, कळलं ना?दादू : (कुतुहलानं) काय घडलं, काय घडलं बरं?.सदू : (भयचकित करणाऱ्या आवाजात) युद्ध झालं, युद्ध !!दादू : (आश्चयचकित होत) मला वाटलंच होतं तसं होणार, ते राजदवाले तसं सोडणार नाहीत, त्या कमळवाल्यांना!सदू : (वैतागून) बिहारमधल्या निवडणुकीबद्दल नाही सांगत दादूराया, भारतीय लष्करानं पाकड्यांची जिरवली चांगलीच!!दादू : (खाडकन सलाम ठोकत) भारतीय सैन्याचा विजय असो!!सदू : (ऐकू न आल्यानं) हल्लो…कुठं गायब झालास? हल्लो…हल्लो…!दादू : (पुन्हा लाइनवर येत) सलाम ठोकताना फोन पडला…सॉरी!सदू : (नाक वाकडं करत) पहिल्यापासूनच तू असा वेंधळा आहेस! इतकं सगळं घडून गेलं, आख्खा देश युद्धाच्या वातावरणानं भारलेला होता, पण तू कुठे होतास?.दादू : (ताठ मानेनं) मला माझ्या लष्कराचा विलक्षण अभिमान वाटतो! या युद्धप्रसंगी आम्ही सगळे विरोधक मोदी सरकारच्या पाठीशी उभे राहिलो, म्हणून आपल्याला विजय प्राप्त झाला!सदू : (तिरसटपणाने) मोदी सरकारचा काय संबंध? विजय लष्कराचा झाला! हे गेले होते का बंदुका घेऊन लढायला? का तुम्ही गेला होता?दादू : (थोरल्या भावाच्या भूमिकेत शिरत) तुला कळत नाही! काहीही बोलतोस तू!! ही वेळ राजकारणाची नसते!सदू : (टोमणा मारत) युरोपला हिंडायला जाण्याची असते?दादू : (चिडून) तू तरी कुठं इथं होतास? आपण सांगे लोकांना, आणि रुमाल आपल्या नाकाला..!!सदू : (धोरणीपणानं नमतं घेत) तू आलास, माझ्या जीवात जीव आला!!दादू : (दिलासा देत) सदूराया, भिऊ नकोस, मी तुझ्या पाठीशी आहे! आता मी इथेच आहे, इथेच आहे, इथेच आहे! पुढल्या उन्हाळ्यापर्यंत आता कुठेही जाणार नाही!सदू : (मूळ मुद्द्यावर येत) आता आपण कसं करायचं? आय मीन ‘ऑपरेशन पालिका’ मोहीम छेडण्याची वेळ समीप आली आहे!! परदेशी जाण्यापूर्वी आपलं काय ठरलं होतं, ते आठव!दादू : (अभिमानानं) डोण्ट वरी! मी लागलोसुद्धा कामाला!! पक्षाच्या तयारीचा आढावा घेण्याचं काम चाललं आहे! काहीही झालं तरी मशाल पेटणारच! किंबहुना पेटवल्याशिवाय राहणार नाही! का नको पेटवू? पेटवणारच!सदू : (काळजीच्या सुरात) अरे, आपल्या संभाव्य टाळीचं काय?दादू : (डायलॉग मारत) वहां से गोली चलेगी, तो यहां से गोला चलेगा, वहां से टाली मिलेगी तो यहां से…जुळव आता यमक! जय महाराष्ट्र!.सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

ढिंग टांग : युद्ध आमुचे सुरू...!

Related Stories