Saina Nehwal Retirement : साईना नेहवालची निवृत्ती: भारतीय बॅडमिंटनला दिला नवा आयाम

जयेंद्र लोंढे

भारताची पहिली खरीखुरी ‘फुलराणी’ या नावाने ओळखल्या जाणाऱ्या साईना नेहवालने जानेवारीत एका मुलाखतीदरम्यान निवृत्ती घोषित केली. मागील दोन वर्षे ती बॅडमिंटन कोर्टवर उतरली नव्हती. बॅडमिंटनपासून दूर जाणे हे अधिकृतपणे सांगण्याची काय गरज, असे ती या वेळी म्हणाली. स्वत:च्या अटीवर मी या खेळामध्ये आली अन्‌ स्वत:च्या अटीनुसार यामधून बाहेर गेली, असे सांगताना तिने कोर्टबाहेरही दमदार स्मॅश लगावला. तिच्या आंतरराष्ट्रीय स्तरावरील देदीप्यमान कामगिरीमुळे भारतामध्ये बॅडमिंटनला वेगळी उंची प्राप्त झाली. विशेषत: महिला खेळाडूंमध्ये कारकीर्द घडवण्याची उमेद निर्माण झाली.