Shahaji Raje Bhosale
esakal
तत्कालीन बलाढ्य सत्ताधीशांकडे चाकरी करूनही स्वतंत्र ओळख निर्माण करणारे शाहजीराजे हे ‘किंगमेकर’ होते. त्यांच्या कारकिर्दीचे टप्पे व त्यातील प्रमुख लढाया महत्त्वपूर्ण आहेत. निजामशाहीतील झंझावात (१६२१ ते १६२४) इ.स.१५८० च्या दरम्यान विजापूरच्या आदिलशाही सैन्याशी कोल्हापूर येथे झालेल्या लढाईत निजामशाहीचे मातब्बर सरदार वणंगपाळ निंबाळकरांच्या नेतृत्वाखाली मालोजीराजे व त्यांचे बंधू विठोजींनी अभूतपूर्व पराक्रम गाजविला. ही कर्तबगारी पाहून निजामशाहने मालोजींना ‘राजा’ किताबासह पुणे प्रांताची जहागिरी दिली तर वणंगपाळांनी आपली कन्या दीपाबाई हिचा हात त्यांच्या हाती दिला. त्यांना शाहजी व शरीफजी अशी दोन मुले झाली.