सातारा : मुंबई- गोवा महामार्गावर रविवारी सायंकाळच्या सुमारास कशेडी (ता. खेड, जि. रत्नागिरी) येथे चारचाकी वाहनाच्या झालेल्या अपघातात फत्यापूर (ता. सातारा) येथील पंकज भगवान घाडगे (वय ३९) यांचा उपचारादरम्यान मृत्यू झाला. या अपघातात सात ते आठ जण किरकोळ जखमी झाले असून, मृत आणि जखमी रत्नागिरी येथे फिरण्यासाठी निघाले होते.
फत्यापूर येथील आठ ते दहा तरुण दोन दिवसांपूर्वी रत्नागिरी येथे फिरण्यासाठी चारचाकीतून गेले होते. याठिकाणी फिरल्यानंतर ते काल गावाकडे परतत होते. परतीचा प्रवासादरम्यान त्यांची चारचाकी खेड तालुक्यातील कशेडी टॅबच्या हद्दीतील खवटी या गावाजवळ आली. त्या वेळी चारचाकी दुभाजकाला धडकली आणि पलटी झाली. या अपघातात चारचाकीत असणारा पंकज घाडगे आणि त्याचे मित्र जखमी झाले. अपघात झाल्याचे समजताच स्थानिकांनी, तसेच पोलिसांनी तिकडे धाव घेत मदतकार्य सुरू करत जखमींना खेड तालुक्यातील कळंबणी उपजिल्हा रुग्णालयात दाखल केले. याठिकाणी झालेल्या वैद्यकीय तपासणीअंती पंकज घाडगे यांना मृत घोषित करण्यात आले.
अपघाताची माहिती मिळाल्यानंतर फत्यापूर येथील ग्रामस्थ, तसेच नातेवाइकांनी तिकडे धाव घेतली. याठिकाणचे शासकीय सोपस्कार पार पडल्यानंतर पंकज यांचा मृतदेह ताब्यात घेत नातेवाईक फत्यापूरकडे मार्गस्थ झाले. या अपघातात किरण घाडगे (वय ३०), राहुल घाडगे (वय २९), आकाश काळंगे (वय २४), सचिन घाडगे (वय ३२), रोहन शिंदे (वय २६) व इतरांना किरकोळ स्वरूपाच्या दुखापती झाल्या असून, त्यांच्यावर उपचार सुरू आहेत.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.