राष्ट्रवादीचा मार्ग मोकळा; 'नगराध्यक्ष' शर्यतीतून भाजप, सेनेची माघार

दहिवडी (सातारा) : दहिवडी नगरपंचायतीच्या (Dahiwadi Nagar Panchayat) नगराध्यक्षपदाच्या निवडीत नाट्यमय घडामोडी घडत आज भाजप (BJP) व शिवसेनेच्या (Shiv Sena) उमेदवारांनी माघार घेतल्याने उद्या राष्ट्रवादीच्या (NCP) सागर पोळ यांच्या नगराध्यक्षपदी निवडीची फक्त औपचारिकता उरली आहे.

नगरपंचायत निवडणूक सुरुवातीपासून गाजली. त्यात अपक्षाच्या मदतीने राष्ट्रवादीला काठावरचे बहुमत मिळाले. राष्ट्रवादीच्या महेश जाधव यांच्या बंडाने वातावरण ढवळले. नंतर त्यांनी माघार घेतल्याने हे बंड शमले. त्यानंतर भाजपचे धनाजी जाधव व शिवसेनेच्या सुरेखा पखाले यांच्यापैकी कोण माघार घेणार, की दोन्ही अर्ज राहणार, की कोण कोणाला साथ देणार, याबद्दल चर्चा घडू लागल्या.

चमत्कार घडेल अशी अपेक्षा दोन्ही पक्षांच्या कार्यकर्त्यांना होती. मात्र, प्रयत्न करूनही विजयाचे गणित जुळत नाही, हे लक्षात येताच आज धनाजी जाधव व सुरेखा पखाले यांनी आपले उमेदवारी अर्ज माघारी घेतले. त्यामुळे राष्ट्रवादीचे सागर पोळ यांचा एकमेव उमेदवारी अर्ज शिल्लक राहिल्याने उद्या त्यांच्या बिनविरोध निवडीची फक्त औपचारिकता राहिली आहे.