आगामी सर्व निवडणुका भा‍जप स्‍वबळावर लढणार; कोअर कमिटीची लवकरच घोषणा

सातारा : सातारा पालिकेसह (Satara Municipality) सर्वच ठिकाणच्‍या निवडणुका भारतीय जनता पक्ष (Bharatiya Janata Party) स्‍वबळावर चिन्‍हावर लढणार असून, त्‍यासाठीची कोअर कमिटी (BJP Core Committee) लवकरच तयार करण्‍यात येणार असल्‍याची माहिती भाजपचे शहराध्‍यक्ष विकास गोसावी (Vikas Gosavi) यांनी पत्रकाव्‍दारे दिली. याच पत्रकात त्‍यांनी भाजप कुणासाठी आणि कुणालाही पर्याय नसल्‍याचे स्‍पष्‍ट करत धोका होण्‍याची शक्‍यता असलेल्‍या ठिकाणी पक्षाने स्‍वतंत्र यंत्रणा उभारल्‍याचेही नमूद केले आहे.

सातारा पालिकेसह इतर सर्वच ठिकाणच्‍या निवडणुकांच्‍या अनुषंगाने श्री. गोसावी यांनी भूमिका पत्रकात मांडली आहे. पत्रकात म्‍हटले आहे की, कुणीही यावे आणि टपली मारून जावे, इतका भाजप लहान राहिला नसून तो स्‍वत:च्‍या ताकदीवर सत्ता खेचून आणू शकतो. साताऱ्यातील पक्षाचे संघटन मजबूत असून, त्‍यातील कोणीही इतके-तिकडे गेले नाही अथवा जाणार नाही. काही कारणांनी पदे दिलेल्‍या दुतोंडी कार्यकर्त्यांवर संघटनेची कोणतीही जबाबदारी देण्‍यात आलेली नाही. आगामी काळात अशा का‍र्यकर्त्यांकडून होणारा धोका टाळण्‍यासाठी त्‍याठिकाणी पक्षाने स्‍वतंत्र यंत्रणा तयार ठेवली आहे.

सातारा पालिकेच्‍या गत निवडणुकीत पक्षाने ३१ उमेदवार रिंगणात उतरवत सहा जणांना निवडून आणले होते. त्‍यानंतर विविध उपक्रमांच्‍या माध्‍यमातून पक्षाने सातारकरांना आपलेसे केले असून, त्‍याबाबत नेहमीच माजी मुख्‍यमंत्री देवेंद्र फडणवीस (Devendra Fadnavis) आणि प्रदेशाध्‍यक्ष चंद्रकांत पाटील (Chandrakant Patil) यांनी पदाधिकाऱ्यांचे कौतुक केले आहे. येत्‍या निवडणुकीत प्रत्‍येक प्रभागात भाजपकडे उमेदवार उपलब्‍ध असून, त्‍यासाठीचा सर्व अभ्‍यास, आराखडा करण्‍याचे काम सध्‍या सुरू आहे. पक्षाचे वरिष्‍ठ तसेच जिल्‍हाध्‍यक्ष विक्रम पावसकर (Vikram Pawaskar) यांच्‍या नेतृत्त्‍वाखाली सर्व पालिका निवडणुका भाजपच्‍या चिन्‍हावर लढणार आहे. यासाठीच्‍या कोअर कमिटीची घोषणाही लवकरच होईल तसेच आगामी नगराध्‍यक्षा भाजपचाच असेल, असा विश्‍‍वासही श्री. गोसावी यांनी पत्रकात व्‍यक्‍त केला आहे.