लोणंदला अतिक्रमणे हटाव मोहीम सुरूच

लोणंद - शहरात आज दुसऱ्या दिवशीही तहसीलदार दशरथ काळे, मुख्याधिकारी संजय गायकवाड, सार्वजनिक बांधकाम विभागाने चोख पोलिस बंदोबस्तात दिवसभर अतिक्रमण हटाव मोहीम राबवली. पालखी तळाचा परिसर व पालखी मार्गावरील २०० ते २५० टपऱ्या, शेड, दुकानसमोरच्या पायऱ्या, कठडे, छोटे- मोठे फलक जेसीबीने जमीनदोस्त केले. त्यामुळे पालखी मार्ग व पालखी तळाचा परिसर पूर्णपणे मोकळा झाला आहे.

आज सकाळी ९ वाजल्यापासून या मोहिमेस प्रारंभ झाला. रात्री उशिरापर्यंत ही मोहीम सुरू होती. तहसीलदार काळे, मुख्याधिकारी संजय गायकवाड, सार्वजनिक बांधकाम विभागाचे शाखा अभियंता पांडुरंग मस्तूद, सहायक पोलिस निरीक्षक विशाल वायकर व त्यांचे सहकारी, नगरपंचायतीचे सहायक नगररचनाकार दिनेश नेरकर, नगर अभियंता सागर मोटे, कार्यालयीन अधीक्षक शंकरराव शेळके, रोहित निंबाळकर, विजय बनकर यांच्यासह २० ते २५ कर्मचारी, लोणंदच्या मंडलाधिकारी रूपाली यादव, तलाठी श्रीकांत डटलोड, पिंकी वाझे, जोतिराम दगडे, चंद्रकांत जाधव, विठ्ठल कुंभार, सार्वजनिक बांधकाम विभागाचे सहायक अभियंता आशिष कर्वे, तसेच वीज वितरण कंपनीचे कर्मचारी व अधिकारी सहभागी झाले होते.

आज सकाळी ९ वाजता तहसीलदार काळे व मुख्याधिकारी गायकवाड यांच्या उपस्थितीत दोन जेसीबी, २ क्रेन, तीन ट्रॅक्टर, तसेच नगरपंचायतीच्या कर्मचाऱ्याच्या पथकाने पालखीतळावरील स्वामी समर्थ मठाच्या परिसरातील, तसेच राजलक्ष्मी सिनेमागृहाकडे जाणारा रस्त्यावरची अतिक्रमणे हटविली. त्यानंतर खंडाळा रस्त्याच्या दोन्ही बाजूकडील, नवी पेठ, शास्त्री चौक, लोणंद- सातारा रस्त्याच्या दोन्ही बाजूकडील, गणपती मंदिर व साईबाबा मंदिर परिसर, बस स्थानकासमोरच्या जुन्या शासकीय दवाखान्याच्या जागेवरील, तसेच शिरवळ रस्ता येथील २०० ते २५० अतिक्रमणे हटविली. वाहतुकीस अडथळा ठरणाऱ्या झाडांच्या फांद्याही जेसीबीने काढण्यात आल्या.