बाजारपेठेत गर्दी उसळताच पोलिसांनी भाजीपाला भरला टेंपोत; शेतकऱ्यांत नाराजी

ढेबेवाडी (सातारा) : कोरोनाच्या (Coronavirus) पार्श्वभूमीवर आठवडा बाजारासह बाजारपेठही (Dhebewadi Market) बंद असताना येथे भाजीपाला व किराणामाल खरेदीसाठी झुंबड उडाल्याने पोलिसांनी तातडीने हस्तक्षेप करून गर्दी पांगवली. रस्त्यावर विक्रीस ठेवलेला भाजीपाला टेंपोतून भरून नेला. (Crowd Of Citizens In Dhebewadi Market Satara Marathi News)

जनता कर्फ्यू पाठोपाठच प्रशासनाने घातलेल्या कडक निर्बंधांची (Lockdown) चांगल्या पद्धतीने अंमलबजावणी केल्याने ढेबेवाडी सद्यःस्थितीस कोरोनामुक्त झालेली असली, तरी अधूनमधून विशेषतः मंगळवारी आठवडा बाजाराच्या दिवशी खरेदी, बॅंकिंग व दवाखान्यात उपचाराच्या निमित्ताने आजूबाजूच्या गावातून येथील बाजारपेठेत होणारी गर्दी चिंता वाढवणारी ठरत आहे. आजही त्याचा प्रत्यय आला. आठवडा बाजाराचा दिवस असल्याने परिसरातील विविध गावांतील नागरिक येथे खरेदी व अन्य कामानिमित्ताने आले होते. रस्त्यावर काही भाजी विक्रेत्यांनी दुकाने मांडली होती. शटर बंद असतानाही किराणा दुकानासमोर नागरिकांची गर्दी दिसत होती.

बॅंकेसमोर सोशल डिस्टन्सिंगचा फज्जा उडवत रांग लागलेली होती. बाजार भरलाय की काय? अशीच काहीशी परिस्थिती निर्माण झाल्याने सहायक पोलिस निरीक्षक संतोष पवार व त्यांच्या सहकाऱ्यांनी तातडीने बाजारपेठेत धाव घेऊन गर्दी पांगवली. रस्त्यावर भाजीविक्री करणाऱ्यांवर वाहतूक पोलिसांनी कारवाई करत भाजीपाला टेंपोत भरून माघारी पाठवले. रस्त्याशेजारी पार्क केलेल्या वाहनांवरही कारवाई करण्यात आली. संतोष पवार म्हणाले, "नियमभंग करणारे दुकानदार, भाजीपाला विक्रेते, नागरिक, वाहनचालक यांच्यावर दंडात्मक कारवाई सुरू आहे. यापुढेही ती सुरूच राहणार आहे. विनाकारण फिरणाऱ्यांची कोरोना चाचणी करण्याची मोहीम पुन्हा नव्याने सुरू करण्यात येणार आहे.''

वांग खोऱ्याच्या मातीतला शेरदिल सुपुत्राची जगण्याची लढाई जरुर वाचा

Crowd Of Citizens In Dhebewadi Market Satara Marathi News