शिक्षण विभागाला उपसभापतींचा घरचा आहेर; कामकाजावर जोरदार ताशेरे | Karad | Sakal
sakal

बोलून बातमी शोधा

कऱ्हाड पंचायत समिती

शिक्षण विभागाला उपसभापतींचा घरचा आहेर; कामकाजावर जोरदार ताशेरे

कऱ्हाड : यशवंतराव चव्हाण शिक्षण मंडळाची स्थापना, शिक्षकांची रिक्त पदे, शालेय परीक्षांचे पेपरच न घेणे, शिक्षक (Teachers) कामावर हजर न राहणे, परस्पर शिक्षकांची नेमणूक करणे, शाळांना (Schools) समायोजन करून शिक्षक न देणे या ना अशा अनेक मुद्द्यांवर पंचायत समितीच्या सभेत आज शिक्षण विभागावर सदस्यांकडून ताशेरे ओढण्यात आले. दरम्यान, उपसभापती रमेश देशमुख यांनीही प्रश्न विचारून पंचायत समितीला घरचा आहेर दिला. सदस्य रमेश चव्हाण यांनी हे प्रश्न आठवड्यात न सुटल्यास सर्व सदस्य उपोषणास बसतील, असा इशाराही दिला. सभापती प्रणव ताटे अध्यक्षस्थानी होते.

शिक्षण विभागाचा आढावा सुरू असताना सदस्य नामदेव पाटील यांनी गोटे येथील शाळेत मागणी करूनही शिक्षक का दिले नाहीत, अशी विचारणा केली. सदस्य बाळासाहेब निकम, पाटील, कारंडे यांनीही शिक्षकांचे प्रश्न उपस्थित केले. त्याचदरम्यान उपसभापती देशमुख यांनी यापूर्वी बैठक घेऊन शिक्षकांचे पंचायत समिती पातळीवर तात्पुरते समायोजन करून विद्यार्थ्यांचे नुकसान टाळवे, असे सांगितले होते, तरीही का कार्यवाही केली नाही, अशी विचारणा गटशिक्षणाधिकारी मुजावर यांना केली.

हेही वाचा: पाचवी-आठवीच्या शिष्यवृत्ती परीक्षेचा निकाल अखेर जाहीर

त्यावर त्यांनी तो प्रस्ताव मान्यतेला पाठवला असल्याचे सांगितले. त्यावर उपसभापती देशमुख यांनी विद्यार्थ्यांचे नुकसान झाले. त्याला कोण जबाबदार, शिक्षक शाळेत जात नाहीत. त्यांना कोण विचारणार? असा प्रश्न उपस्थित केला. त्यावर गटशिक्षणाधिकाऱ्यांनी दिलेले उत्तर न पटल्याने त्यांनी जोरदार ताशेरे ओढले. त्याचदरम्यान सदस्य अॅड. शरद पोळ यांनी ज्येष्ठ नेते यशवंतराव चव्हाण यांच्या नावाने शिक्षण मंडळ सुरू करण्यासाठी आम्ही शाळांना सांगितले होते. नऊ महिन्यानंतरही कार्यवाही का झाली नाही. हे यशवंतराव चव्हाण यांच्या नावाने असलेल्या सभागृहाला शोभते का? असा प्रश्न उपस्थित केला.

त्यावर गटशिक्षणाधिकारी यांनी त्यासाठीच्या जागेला मान्यता मिळाली नाही, असे सांगितले. त्यावर उपसभापती देशमुख यांनी हे तुम्ही आमची टर्म संपत आल्यावर आता सांगताय का? अशी विचारणा करून पहिल्यांदा ते बीआरसीचे कार्यालय बंद करा, तरच अधिकारी कार्यालयात बसतील आणि सर्व कामे मार्गी लागतील, असे अधिकाऱ्यांना सुनावले. त्यावर सभापती ताटे यांनी ही कामाची पद्धत योग्य नसून आवश्यक ती कार्यवाही मुदतीत का झाली नाही, अशी विचारणा केली.

हेही वाचा: दहावीच्या परीक्षेचे तत्कालिक वेळापत्रक जाहीर, परीक्षा होणार लवकर

उपसभापती देशमुख यांनी शिक्षण विभागामार्फत विद्यार्थ्यांच्या परीक्षा घेण्याच्या ठरल्या होत्या. त्याही घेण्यात आल्या नाहीत, असेही सभागृहासमोर छपाई प्रेसवाल्याच्या संभाषणावरून दाखवून दिले. त्यावर गटविकास अधिकारी शशिकांत शिंदे यांनी सर्व खातेप्रमुखांनी पंचायत समितीच्या सभेत जे प्रश्न उपस्थित होतील. त्याची कार्यवाही तातडीने करून त्याची माहिती सदस्य व पदाधिकाऱ्यांना द्यावी, यापुढे कोणीचीही गय केली जाणार नाही, असे सुनावले. या वेळी अन्य विभागांचा आढावा घेण्यात आला.

पाणी योजना लांबल्यामुळे असमाधान

कऱ्हाड तालुक्यात २०१३ पासून पाणी योजनांची कामे अजूनही सुरू आहेत. त्यामुळे सदस्यांनी नाराजी व्यक्त केली. त्यावर पाणीपुरवठा उपअभियंता सुनील बसुगडे यांनी निधीमुळे कामे लांबली असून, ती पूर्णत्वाकडे आल्याचे सांगितले. दरम्यान, पाणी योजनेचे आराखडे तयार करण्यासाठी पैसे मागितले जात असल्याचाही आरोप उपसभापती देशमुख यांनी केला.

Web Title: Karad Panchayat Samiti Education Department

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
टॅग्स :Sataraeducation
go to top