आगाशिव डोंगरातील दरड कोसळली; झुडपांत अडकल्यामुळे टळला अनर्थ!

मलकापूर (सातारा) : आगाशिवनगर लेण्यांच्या परिसरामध्ये नुकतीच अचानक दरड (Landslide) कोसळली. काही अंतरावर येऊन दरड झुडपांमध्ये अडकली. दरड कोसळताना मोठा आवाज झाला. डोंगरावरती फिरायला गेलेल्यांनी प्रत्यक्ष ही घटना पाहिलीय. आगाशिवनगर झोपडपट्टीपासून काही अंतरावरील त्रिमूर्ती कॉलनीलगत सह्याद्री व्याघ्र प्रकल्पाच्या (Sahyadri Tiger Project) कार्यालयावरील बाजूस चूल वैल लेणीच्याजवळ ही घटना घडली. दरड कोसळताना आसपास कोणी नसल्याने व काही अंतरावर जाऊन दरड अडकल्याने पुढील अनर्थ टळला. चूल वैल परिसरातील दरड पडताना मोठा आवाज होऊन धूर निघाला.

वेगाने ही दरड खाली आली व काही अंतरावर थांबली. ही घटना डोंगरावर फिरायला गेलेल्या नागरिकांसमोर घडली. नागरिकांनी तातडीने डोंगरावरून काढता पाय घेतला. गेल्या आठवड्यातच पायथ्याशी असणाऱ्या झोपडपट्टीपासून ३०० फुटांवर दरड कोसळली होती. ही दरड काही अंतरावर जाऊन थांबल्याने मोठा अनर्थ टळला होता. येथील पालिकेने तातडीने जिल्हाधिकाऱ्यांना पाहणी करण्याबाबत निवेदन दिले आहे. दरम्यान, अचानक दरड कोसळल्याने नागरिकांमध्ये भीतीचे वातावरण निर्माण झाले आहे. दाट लोकवस्ती असलेल्या आगाशिवनगरच्या वरील बाजूस डोंगर खचल्याने अनेकांची भीतीने गाळण उडाली.

झोपडपट्टीपासून काही अंतरावर डोंगराईदेवीचे मंदिर आहे. हे मंदिर डोंगरपायथ्याजवळच आहे. गेल्या महिन्यात मंदिराच्या वरील बाजूने लेणी परिसरातूनच मोठा दगड येऊन मंदिराला धडकला. यामध्ये मंदिराचे किरकोळ नुकसान झाले आहे. मंदिराच्या घटनेमुळे झोपडपट्टीधारक स्वतःला नशिबवान समजत आहेत. कारण झोपडपट्टीलगत संरक्षक भिंत असल्यामुळे डोंगरावरून येणाऱ्या दगडांचा त्यांना कमी धोका आहे.