सातारा : तांबवेतील शिवारात बिबट्याचा मुक्काम; शेतकऱ्यांत धास्ती

तांबवे ः गावातील तीन ते चार वेगवेगळ्या ठिकाणच्या शिवारात बिबट्याचा मुक्काम असल्याचे शेतकऱ्यांचे म्हणणे आहे. पहाटे आणि रात्री बिबट्याचा मुक्त संचार तेथील शेतकऱ्यांना पाहायला मिळत आहे. त्याची पाहणी वन कर्मचारी यांनी केली आहे. मात्र, त्याचा बंदोबस्त तातडीने करावा, अशी मागणी येथील ग्रामस्थ व शेतकऱ्यांतून होत आहे.

तांबवे परिसरात चार बिबट्यांचा वावर असल्याची चर्चा आहे. मागील आठवड्यात गावात येऊन त्याने कुत्रे ठार मारले होते. त्यानंतर शिवारातील तीन ठिकाणी शेतकऱ्यांना बिबट्यांचे दर्शन झाले आहे. मध्यंतरी तांबवे गावातील अप्पासाहेब पाटील हा शेतकरी सकाळी सातच्या सुमारास जनावरांच्या शेडमध्ये होता. यानंतर काही वेळाने याच शेडमध्ये जवळच बिबट्या डोकावत असल्याचे त्यांनी पाहिले. त्यांची हालचाल झाल्याचा आवाज येताच बिबट्या उसाच्या शेतात निघून गेला.

दरम्यान पाटील यांनी मोबाईलच्या कॅमेऱ्यात बिबट्याच्या मुक्त संचाराचे चित्रीकरण केले होते. बिबट्यांच्या वावराने परिसरात दहशतीचे वातावरण निर्माण झाले आहे. त्या परिसरात शेतकऱ्यांना जाण्याचे टाळले आहे. वनविभागाने बिबट्यांचा तातडीने बंदोबस्त करावा, शिवारात पिंजरा लावावा, अशी मागणी तांबवे ग्रामस्थांनी वनविभागाकडे केली.