महाराष्ट्राचे मिनी काश्मीर महाबळेश्वरमध्‍ये सर्वाधिक 104 मिलिमीटर पाऊस; कोयनेतून 1 हजार 50 क्‍युसेक पाण्‍याचा विसर्ग

सातारा : गेल्या चोवीस तासांत महाबळेश्वर (Mahabaleshwar) तालुक्यात सर्वाधिक १०४ मिलिमीटर पाऊस झाल्‍याची नोंद जिल्‍हा प्रशासनाकडे झाली आहे.

महाबळेश्‍‍वरबरोबरच सातारा तालुक्‍यात २३.५ मिलिमीटर, जावळीत ४४.०, पाटणमध्‍ये ६६.३, कऱ्हाड- २०.२, कोरेगाव- ८.६, खटाव- ६.९, माण- ६.१, फलटण- १.२, खंडाळा- ६.२, वाई-१९.३ मिलिमीटर इतक्‍या पावसाची नोंद झाली आहे.

जिल्ह्यातील मोठे, मध्‍यम प्रकल्‍पांतर्गत येणाऱ्या धरणांमध्ये एकूण ७२.१९ अब्ज घनफूट पाणीसाठा असून, धरणांमधील पाणीसाठा एकूण क्षमतेच्या ४८.४९ टक्के इतका असल्याची माहिती कृष्‍णा सिंचन विभागाचे उपकार्यकारी अभियंता यांच्‍या कार्यालयाच्‍या वतीने देण्‍यात आली आहे.

महाबळेश्‍‍वर, नवजा या भागात पावसाचा जोर कायम असून, कोयना धरणात (Koyna Dam) येणाऱ्या पाण्‍याच्‍या आवकेत मोठ्या प्रमाणात वाढ झाली आहे. पाण्‍याची आवक विचारात घेत धरण व्‍यवस्‍थापनाने सोमवारी दुपारी चारनंतर पायथा वीजगृहातून १ हजार ५० क्‍युसेक इतक्‍या पाण्‍याचा विसर्ग सुरू केला. विसर्गाच्‍या पार्श्वभूमीवर नदीकाठावरील गावांत सतर्कतेच्‍या सूचना करण्‍यात आल्‍या आहेत.